აფხაზეთის თვითგამოცხადებული რესპუბლიკის პარლამენტის დეპუტატებმა პრეზიდენტ ასლან ბჟანიას გადადგომას მხარი დაუჭირეს. რადიო თავისუფლების რუსულენოვანი პროგრამის, ეხო კავკაზას ცნობით, დე ფაქტო რესპუბლიკის პრეზიდენტის მოვალეობას ვიცე-პრეზიდენტი ბადრა გუნბა შეასრულებს.

გამოცემის ცნობით, როგორც აფხაზეთის ე.წ. პარლამენტის თავმჯდომარემ ლაშა აშუბამ განაცხადა, დღის წესრიგში მხოლოდ ერთი საკითხი — ბჟანიას გადადგომის განცხადება იყო. პრემიერ-მინისტრის პოსტზე პარლამენტის ყოფილი სპიკერი ვალერი ბგანბა დაინიშნა.

კენჭისყრაში მონაწილეობა 31 დეპუტატმა მიიღო, 2 ბიულეტენი ბათილად იქნა გამოცხადებული. ასლან ბჟანიას გადადგომას 28-მა დეპუტატმა მხარი დაუჭირა, ერთი წინააღმდეგი წავიდა.

სოხუმში ვითარება 15 ნოემბერს დაიძაბა. ადგილობრივი ოპოზიციის წარმომადგენლები და მათი მხარდამჭერები დე ფაქტო პრეზიდენტის ადმინისტრაციის და დე ფაქტო პარლამენტის შენობებში შეიჭრნენ და ე.წ. პრეზიდენტის, ასლან ბჟანიას გადადგომა მოითხოვეს.

15 ნოემბერს დე ფაქტო პარლამენტს უნდა განეხილა ადგილობრივი ოპოზიციის და საზოგადოების ნაწილის პროტესტის გამომწვევი, ე.წ. რუსეთ-აფხაზეთის საინვესტიციო შეთანხმების რატიფიკაციის საკითხი. ეს შეთანხმება რუსულ კომპანიებს აფხაზეთში საინვესტიციო პროექტების განხორციელების შესაძლებლობას და არაერთ შეღავათს აძლევს.