პარტია ერთიანობა — ნაციონალური მოძრაობის წევრებმა ფურცლები დატოვეს სააპელაციო სასამართლოს წინ, რომელიც მათი შეფასებით არის არჩევნების გაყალბების დამადასტურებელი მტკიცებულებები.

ამასთან, სააპელაციო სასამართლოსთან მათ თან მიიტანეს პლაკატები წარწერით: “დაიბრუნე შენი ხმა!”, “გაუქმებულია სასამართლო!”, “გაუქმებულია არჩევნები!”. სასამართლოსთან 26 ოქტომბრის საპარლამენტო არჩევნების შედეგების ბათილობასთან დაკავშირებით საჩივრები განიხილება.

პარტია ერთიანობა — ნაციონალური მოძრაობის ერთ-ერთი ლიდერის, თამარ კორძაიას შეფასებით, საქართველოს მოსამართლეებმა მტკიცებულებები აქციეს მაკულატურად.

"დღეს დილიდან ხაზს ვუსვამ, რომ გაუქმეს სასამართლო მოსამართლეებმა. მაკულატურად აქციეს ყველა ის ქაღალდი და მტკიცებულება, რომელსაც ჩვენ დღეს წარვუდგენდით. არაფერს აზრი არ ჰქონია, ამიტომ თქვენ თვალწინ ამ მაკულატურას [სააპელაციო სასამართლოს] კიბეებზე დავტოვებთ, დავუყრით. იმიტომ, რომ მათ ეს [მტკიცებულებები] არ აინტერესებთ. არც კითხულობენ, არც აანალიზებენ და წერენ იმას, რასაც ბიძინა ივანიშვილი დაავალებს მათ. ამიტომ მათ სამართალს ახლა აქ დავუყრით და აქედან წავალთ", — განაცხადა კორძაიამ.

ცნობისთვის, ერთიანობა — ნაციონალური მოძრაობის, ძლიერი საქართველოსა და საიას 26 ოქტომბრის საპარლამენტო არჩევნების ბათილად ცნობის შესახებ სარჩელებს სააპელაციო სასამართლო მოსარჩლე მხარეების მონაწილეობის გარეშე განიხილავს.