ამანდა საიფრედმა მუშაობასა და ცხოვრებას შორის იდეალური ბალანსი იპოვა. მიუხედავად იმისა, რომ მსახიობი წლების წინ ჰოლივუდის ბრწყინვალებით იყო მოხიბლული, ახლა მას სიმშვიდისკენ მიუწევს გული. სწორედ ამიტომ ამანდა ქმართან და ორ შვილთან ერთად ნიუ-იორკის მახლობლად ფერმაში ცხოვრობს.

"ოჯახის შექმნამდე დიდი ხნით ადრე გადავედი საცხოვრებლად ფერმაში. აქ ცხოვრება კონფიდენციალურობის, სიმშვიდისა და ბუნების გამო საუკეთესო გადაწყვეტილებაა. ის უფრო დაბალანსებულ ცხოვრებას გვთავაზობს, ვიდრე ქალაქი და ეს ჩემი ფსიქიკური ჯანმრთელობისთვის აუცილებელია" — განუცხადა ცოტა ხნის წინ ამანდამ Forbes-ს

ფოტო: reddit

"ჩემი კარიერა ძალიან მიყვარს, მაგრამ მშვიდი ადგილი მჭირდება, რომ სახლი დავუძახო. რთულია გამუდმებით ქალაქის სწრაფი ცხოვრების სტილითა და პრესის წნეხის ქვეშ იცხოვრო. ახლა შემიძლია ხალხმრავალ ქალაქში მშვიდად ვისეირნო, რადგან ვიცი რომ მეორე დღეს სახლში ვიქნები, ტალახში ამოსვრილი ფეხსაცმელი მეცმევა და ჩემს საყვარელ ცხოველებს მოვუვლი"

სხვათა შორის, საკმაოდ ხშირად ჰოლივუდის ვარსკვლავები ცხოვრების უფრო მშვიდ ტემპს ამჯობინებენ. ქალაქიდან მოშორებით ფერმაში ცხოვრება ერთგვარი ტენდენცია გახდა. ცოტა ხნის წინ ჯეისონ სეგელმა გაგვიზიარა, რომ ის ლოს ანჯელესიდან გადავიდა და ახლა კალიფორნიის მიმდებარედ მშვიდად ცხოვრობს.

"ხელოვნება უნდა იყოს იმის გამოხატულება, რასაც განიცდი. მე რეალურად ბევრს არაფერს განვიცდიდი. ამიტომ პატარა, მშვიდ ქალაქში გადავედი საცხოვრებლად და თავს ვეკითხებოდი: რა მოგწონს სინამდვილეში? რეალურად რაზე ფიქრობ ახლა? ვინ გინდა, რომ იყო როგორც შემსრულებელი" — განაცხადა How I Met Your Mother-ის ვარსკვლავმა.