11 ნოემბერს ოკუპირებულ აფხაზეთში დაკავებული 5 ოპოზიციონერის მძაფრი პროტესტის ფონზე გაათავისუფლეს. აქციის მონაწილეებმა გახსნეს გზები და მოხსნეს ბარიკადები დაკეტილ ხიდებზე.

ოკუპირებულ ტერიტორიაზე მოქმედი ოპოზიციური "სახალხო მოძრაობის" ლიდერმა, ადგურ არძინბამ საპროტესტო აქციის დასასრული შეაჯამა და დაინტერესებულ მოქალაქეებს მადლიერებით მიმართა:

"მინდა მადლობა გადავუხადო ყველას, ვინც გამოეხმაურა აფხაზეთის აქტიური მოქალაქეების დაკავების აღმაშფოთებელ ინციდენტს, რომლებმაც ღიად გამოხატეს თავიანთი აზრი", — განაცხადა ადგურ არძინბამ.

11 ნოემბერს, გვიან ღამით ოკუპირებულ აფხაზეთში 5 ოპოზიციონერი დეპუტატი — ომარ სმირი, გარი კოკაია, ალმასხან არძინბა, რამაზ ჯოპუა და ასლან გვარამია დააკავეს.

დაკავების შემდეგ, ე.წ. სახელმწიფო უსაფრთხოების სამსახურის შენობასთან ხალხი შეიკრიბა, რომლებიც დაკავებულთა გათავისუფლებას მოითხოვდნენ. აქციის მონაწილეებმა გადაკეტეს გუმისთის და კოდორის ხიდები.

როგორც დაკავებული ოპოზიციონერების მხარდამჭერები აცხადებენ, დაკავებების მიზეზი ის გახდა, რომ ოპოზიციონერები რუსულ-აფხაზური "საინვესტიციო ხელშეკრულების" რატიფიცირებას ეწინააღმდეგებიან, რომლის რატიფიცირებასაც ოკუპირებული აფხაზეთის დე ფაქტო პარლამენტი 15 ნოემბერს გეგმავს. მანამდე გავრცელდა ცნობა იმის შესახებ, რომ ამავე დღეს ოპოზიცია აქციის მოწყობას გეგმავს "საინვესტიციო ხელშეკრულების" რატიფიცირების გასაპროტესტებლად.