თბილისის მერის არჩევნებში კენჭს თავისუფალი საქართველოს ლიდერი კახა კუკავაც იყრის. ის დღეს, 21 აგვისტოს დემოკრატიული მოძრაობა - ერთიანი საქართველოს ლიდერმა, ნინო ბურჯანაძემ წარადგინა. კუკავა 2017 წლის თვითმმართველობის არჩევნებში ორივე ამ პარტიის სახელით მონაწილეობს.

"ჩვენ, აქ მყოფი ადამიანები ვართ ის პოლიტიკოსები რომლებმაც ჩვენი პირადი, პარტიული ინტერესები გადავდეთ გვერდით ერთიანობისათვის. ერთიანობას აქვს სასიცოცხლო მნიშვნელობა იმიტომ, რომ მხოლოდ ოპოზიციის ერთიან კანდიდატს შეუძლია დაამარცხოს ხელისუფლება, როგორც მინიმუმ მიაღწიოს მეორე ტურს, მეორე ტურში კი რეალური გამარჯვების შანსი გაუჩნდება", - განაცხადა ნინო ბურჯანაძემ კუკავას წარდგენამდე.

მანვე თბილისის საკრებულოს თავმჯდომარეობის კანდიდატად დიმიტრი ლორთქიფანიძე წარადგინა.

ნინო ბურჯანაძის თქმით, სხვა ოპოზიციურმა პარტიებმა პარტიული ინტერესები უფრო მაღლა დააყენეს, კონსულტაციებზე უარი თქვეს და მერობის თავიანთი კანდიდატი დაასახელეს.

დემოკრატიული მოძრაობა - ერთიანი საქართველო თავისუფალ საქართველოსთან ერთად საერთო კანდიდატის დასახელებაზე კონსულტაციებს პატრიოტთა ალიანსთან მართავდა. თუმცა, პატრიოტთა ალიანსმა არჩევნებში მონაწილეობა დამოუკიდებლად გადაწყვიტა და მერობის კანდიდატად პარტიის ლიდერი და პარლამენტის წევრი, ირმა ინაშვილი დაასახელა.