აზერბაიჯანის საელჩოსთან თბილისში დაკავებული აზერბაიჯანელი ჟურნალისტის, აფგან სადიგოვის მეუღლე სევინჩ სადიგოვა და მისი შვილები საპროტესტო აქციას მართავენ. აქციაზე იმყოფება შვედი კლიმატის აქტივისტი გრეტა თუნბერგიც.

აფგანის ოჯახს ჟურნალისტები და სამოქალაქო აქტივისტებიც უერთდებიან. "თავისუფლება აზერბაიჯანელ პოლიტიკურ პატიმრებს", "ილჰამ ალიევი დიქტატორი", "სოლიდარობა აფგან სადიგოვს", "COP29 პოლიტიკური ფარისევლობაა" — ვკითხულობთ მხარდამჭერების პლაკატებზე.

დღესვე, 16:00 საათზე თბილისის საქალაქო სასამართლოში აფგან სადიგოვის საქმის განხილვა იწყება, რომელიც მისთვის საერთაშორისო დაცვის სტატუსის მინიჭებაზე უარს ეხება.

აზერბაიჯანელი ჟურნალისტი და აქტივისტი აფგან სადიგოვი 3 აგვისტოს დააკავეს და 21 სექტემბრიდან შიმშილობს. 1-ელ ნოემბერს სადიგოვის საექსტრადიციო პატიმრობა 3 თვით, 3 თებერვლამდე გაგრძელდა. გადაწყვეტილება თბილისის საქალაქო სასამართლოს მოსამართლემ, არსენ კალატოზიშვილმა მიიღო. როგორც პროკურორმა განაცხადა, ის კვლავ იძებნება აზერბაიჯანის რესპუბლიკის სამართალდამცავი ორგანოების მიერ და მას პროფესიული საქმიანობის გამოყენებით ადამიანის საკუთრების წინააღმდეგ ჩადენილ დანაშაულს ედავებიან.

საპროტესტო აქციის ამსახველ ფოტოებს მედიაჩეკერი ავრცელებს.

აქცია აზერბაიჯანის საელჩოსთან

აქცია აზერბაიჯანის საელჩოსთან

ფოტო: მარიამ ნიკურაძე