ონლაინ გამოცემა ექსპრესნიუსის (EPN) რედაქტორი ირაკლი მანაგაძე ფეისბუკზე წერს, რომ მათ ვებგვერდს ჰაკერები დაესხნენ და საიტზე 2009 წლიდან არსებული ყველა ფაილი წაშალეს:

"აღარ არსებობს ექსპრესნიუსის ვებგვერდი. კონტრაქტორმა სერვერის უზრუნველმყოფმა კომპანიამ პასუხისმგებლობა მოიხსნა და აღნიშნა, რომ ყველა ბაზა და ფაილი წაშლილია და ვერაფრით ვერ მოახერხებდნენ ასეთი თავდასხმისგან ExpressNews დაცვას".

საიტზე შესვლისას, მომხმარებელს ხვდება წარწერა: "ექსპრესნიუსი მუშაობას უახლოეს საათებში აღადგენს".

მანაგაძის თქმით, ამ დროისთვის სპეციალისტები საიტის ფოტო, ტექსტ და ვიდეო არქივის აღსადგენად მუშაობენ. ის დასძენს, რომ დღეს რედაქცია შინაგან საქმეთა სამინისტროში საჩივარს შეიტანს.

როგორც On.ge შსს-ში განუცხადეს, საკითხზე ინფორმაცია უკვე აქვთ და მიმართვის შემდეგ, უწყება შესაბამის რეაგირებას მოახდენს.