ევროპულმა საქართველომ ამბროლაურში მერობის კანდიდატი წარადგინა. პარტიის ლიდერებმა, გიგი უგულავამ და გიგა ბოკერიამ კანდიდატად მაია კაციტაძე დაასახელეს.

ევროპული საქართველო ადგილობრივ ამომრჩეველს ბიუროკრატიული ხარჯების გაუქმებას და პენსიის 50 ლარით მომატებას ჰპირდება.

მაია კაციტაძე კონფლიქტებისა და მოლაპარაკებების საერთაშორისო კვლევითი ცენტრის აღმასრულებელი დირექტორი და რეგიონალური განვითარების ფონდის დამფუძნებელია.

ამბროლაური ერთ-ერთია იმ შვიდი ქალაქიდან, რომელსაც მმართველი პარტიის, ქართული ოცნების გადაწყვეტილებით თვითმმართველი ერთეულის სტატუსი გაუუქმდა.

ცვლილების თანახმად, შვიდ თვითმმართველ ქალაქს - თელავს, ოზურგეთს, ზუგდიდს, გორს, ამბროლაურს, მცხეთასა და ახალციხეს ჩამოერთმევა თვითმმართველი ქალაქის სტატუსი და ისინი მიუერთდება შესაბამის მუნიციპალიტეტებს. შედეგად, ქვეყანაში, ნაცვლად 12 თვითმმართველი ქალაქისა, დარჩება 5 თვითმმართველი ქალაქი. თავდაპირველად, პრეზიდენტმა საარჩევნო კოდექსში შესატან ცვლილებებსაც ვეტო დაადო, თუმცა მოგვიანებით, პარლამენტმა გიორგი მარგველაშვილის მოტივირებული შენიშვნები არ გაითვალისწინა და ვეტო დაძლია.