კოალიცია ძლიერი საქართველოს ლიდერმა, ანა ნაცვლიშვილმა საზოგადოებას ახალი ინიციატივა გააცნო — კოალიციამ სოციალურ პლატფორმაზე შექმნა ჯგუფი "დაიცავი შენი ხმა, ვითხოვთ ახალ არჩევნებს", სადაც განთავსებული იქნება 2 ინსტრუმენტი, რაც საშუალებას მისცემს თითოეულ მოქალაქეს, ოფიციალური განაცხადით მიმართოს ცესკოს და მოითხოვოს ბათილად იყოს ცნობილი 26 ოქტომბრის საპარლამენტო არჩევნების შედეგები და დაინიშნოს ხელახალი არჩევნები.

მეორე ინსტრუმენტი მომზადებულია ემიგრანტებისთვის, რაც მათ შესაძლებლობას მისცემს მიმართონ ცესკოს, გასაჯაროვდეს ვერიფიკაციის ხელმოწერილ ქვითრებში ხომ არ არის მათი მონაცემები ბოროტად გამოყენებული.

"მინდა გაგაცნოთ ძლიერი საქართველოს ახალი ინიციატივა, რომელიც თითოეულ მოქალაქეს მისცემს შესაძლებლობას ოფიციალური განაცხადით მიმართოს ცესკოს და მოითხოვოს იმ ნაბიჯების გადადგმა, რომელიც მას ევალება და რომელსაც აქამდე ჯიუტად არ დგამდა ჩვენი მიმართვის საფუძველზე.

...შევქმენით ინსტრუმენტები, რომელიც საქართველოს თითოეულ მოქალაქეებს უბრუნებს როლს ამ პროცესში. ჯგუფი შეიქმნა ფეისბუქ პლატფორმაზე, სადაც ორი ინსტრუმენტი განთავსდება. ეს არის განცხადებების ფორმით, საქართველოს კანონმდებლობაზე დაფუძნებით, შედგენილი 2 ინსტრუმენტი, რომლის გამოყენებაც ყველას შეგეძლებათ.

ერთი არის მომზადებული ემიგრანტებისთვის. უნდა მიმართოთ ცესკოს, რომ გასაჯაროვდეს ვერიფიკაციის ხელმოწერილ ქვითრებში ხომ არ არის თქვენი მონაცემები ბოროტად გამოყენებული. ცესკო ვალდებულია გიპასუხოთ ამაზე და გადადგას შესაბამისი ნაბიჯები.

მეორე ინსტრუმენტი ეს არის განაცხადის ფორმა, რომლითაც საქართველოს თითოეულ მოქალაქეს შეუძლია მიმართოს ცესკოს და მოითხოვოთ, ვინაიდან დაირღვა არჩევნების ფუნდამენტური კონსტიტუციური პრინციპი — ხმის ფარულობის უფლება, ბათილად იყოს ცნობილი არჩევნების შედეგები და დაინიშნოს ხელახალი არჩევნები.

ამ ინსტრუმენტებს განვათავსებთ შესაბამის პლატფორმაზე - "დაიცავი შენი ხმა, ვითხოვ ახალ არჩევნებს", — ასე შეგიძლიათ მოძებნოთ და შემოუერთდეთ ამ ჯგუფს ფეისბუქზე", — განაცხადა ანა ნაცვლიშვილმა.

FB: "დაიცავი შენი ხმა, ვითხოვ ახალ არჩევნებს"