AMC-ის გახმაურებული გოტიკური დრამა მეიფერის ჯადოქრები გრძელდება. საშინელებათა ჟანრის სერიალი, რომელიც ენ რაისის წიგნებს ეფუძნება, იანვარში მეორე სეზონით დაბრუნდება. მანამდე კი, უკვე გვაქვს შესაძლებლობა, ახალი სეზონის ტრეილერს შევავლოთ თვალი.

"ლაშერი მეიფერის ქალებზე ნადირობს", — ამბობს ვიდეოში ალექსანდრა დადარიოს პერსონაჟი, სერიალის მთავარი გმირი როუენი, — "ამას მე მივხედავ".

დადარიოს გარდა, სერიალის მეორე სეზონში ასევე ვიხილავთ ჯეკ ჰიუსტონს ლაშერის როლში და ჰარი ჰემლინს კორტლანდ მეიფერის როლში. მეიფერის ჯადოქრებს ამ სეზონზე სიტკომ Superstore-ის ვარსკვლავი ბენ ფელდმანიც შეუერთდება.

მეიფერის ჯადოქრების პირველი სეზონის პრემიერა ამერიკულ ტელეარხ AMC-ზე 2023 წლის დასაწყისში შედგა. სერიალი, როგორც უკვე ვთქვით, ენ რაისის ტრილოგიას, მეიფერის ჯადოქართა ცხოვრებას, ეფუძნება. ის სანფრანცისკოელ ნეიროქირურგ როუენ მეიფერზე მოგვითხრობს, რომელიც დედის გარდაცვალების შემდეგ ახალ ორლეანში ოჯახის მშობლიურ სახლს უბრუნდება. როუენი სწორედ იქ იგებს, რომ იგი ძლევამოსილი ჯადოქრების შთამომავალია, მისი სახლი კი — მკვლელობებითა და გაუჩინარებებით განთქმული ადგილი.

AMC-ის ნამუშევარია ასევე რაისის კიდევ ერთი წიგნების სერიის, ვამპირის ქრონიკების, ტელეეკრანიზაცია, რომლის მეორე სეზონის პრემიერაც მაისში შედგა. სერიალს უკვე დაუმტკიცდა მე-3 სეზონიც.

რაც შეეხება მეიფერის ჯადოქრებს, სერიალის მეორე სეზონის პირველ სერიას მაყურებელი 5 იანვარს იხილავს.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…