თბილისის სააპელაციო სასამართლოსთან საპარლამენტო არჩევნების შედეგების არალეგიტიმურად ცნობის მოთხოვნით საპროტესტო აქცია მიმდინარეობს. 12 საათისთვის სასამართლოში სხდომაა ჩანიშნული, რითაც არასამთავრობო ორგანიზაციები ბიულეტენების ხელახლა გადათვლას ითხოვენ.

სააპელაციო სასამართლოს ეზოში და მიმდებარე ტერიტორიაზე კრიმინალური პოლიციის თანამშრომლები არიან მობილიზებული. გავრცელებული ინფორმაციით, სასამართლოს შიდა ტერიტორიაზე პოლიციის მაღალჩინოსნები იმყოფებიან, მათ შორის ცენტრალური კრიმინალური პოლიციის შეფი თეიმურაზ კუპატაძე.

ტვ პირველის ინფორმაციით, სამმართველოს ტერიტორიაზე სპეცრაზმელების 5 ავტობუსი დგას. ისინი აღჭურვილი არიან ხელკეტებითა და ფარებით.

"სასამართლოს გუშაგის" ხელმძღვანელის, ნაზი ჯანეზაშვილი თქმით, რომ სასამართლოს შენობაში არც სადამკვირვებლო ორგანიზაციებს უშვებენ და არც ოჯახის წევრებს, რომლებიც ნათესავების სისხლის სამართლის საქმის განხილვაზე მივიდნენ.

"საქართველოს კონსტიტუციის თანახმად, სხდომები უნდა იყოს ღია თუ კი კანონით არ არის რაიმე კონკრეტული შემთხვევები დადგენილი, ამ სიტუაციაში რა თქმა უნდა, საარჩევნო დავები, რომლებიც დღეს იხილება უნდა იყოს ღია, მაგრამ ისე აღმოჩნდა რომ, ასე გამოდის, თბილისის სააპელაციო სასამართლოს თავმჯდომარეს, მიხეილ ჩინჩალაძეს უფრო მეტი ძალა აქვს ვიდრე საქართველოს კონსტიტუციას, იმიტომ, რომ მან თავს უფლება მისცა რომ სასამართლოს ჭიშკარი დაეკეტა, უშვებენ მხოლოდ მხარეებს და მედიას ამ შემთხვევაში, დამკვირვებელ ორგანიზაციებს, რომლებიც პროცესს აკვირდებიან, არ უშვებენ", – ამბობს ჯანეზაშვილი ფორმულასთან.

ჯანეზაშვილის ვარაუდით, ეს დაკავშირებულია ვლადიმერ ხუჭუას სასამართლო გადაწყვეტილებას თეთრიწყაროს უბნების ბათილად ცნობის შესახებ, რაც მისი თქმით, სასამართლოსთვის აბსოლუტურად მოულოდნელი იყო.

"ჩემი ვარაუდით ეს უკავშირდება ვლადიმერ ხუჭუას სასამართლო გადაწყვეტილებას, ეს ყველაფერი რაც დღეს ხდება გუშინ და დღეს სასამართლოში იმიტომ, რომ როგორც ჩანს ეს იყო სასამართლოსთვის აბსოლუტურად მოულოდნელი, ის რაც რეზონანსიც გამოიწვია გადაწყვეტილებამ, რა შედეგებიც მოჰყვა, საზოგადოებაში დისკუსია, განხილვა და პოზიტიური გამოხმაურება, როგორც ჩანს ამ სასამართლოსთვის ეს არის მიუღებელი და გადაწყვიტეს, რომ დღეს საერთოდ ასეთი რეჟიმი დააწესონ", – თქვა ჯანეზაშვილმა

შეგახსენებთ, რომ დილიდან სააპელაციო სასამართლოსთან ოპოზიციის აქცია იმართება. აქცია ეხება 26 ოქტომბრის საპარლამენტო არჩევნებს, ისინი მოპარული ხმების უკან დაბრუნებას ითხოვენ.

სააპელაციო სასამართლოში ერთმანეთის მიყოლებით დავების განხილვაა ჩანიშნული.