დღეს, 4 ნოემბერს, საქართველოს პარლამენტის თავმჯდომარემ, შალვა პაპუაშვილმა ბრიფინგი გამართა. პაპუაშვილმა ქართული ოცნების მიერ არჩევნების გაყალბებასთან დაკავშირებით ბრალდებებსა და ოპოზიციისა და მმართველი პარტიის წინასაარჩევნო კამპანიებზე ისაუბრა.

ბრიფინგის ერთ-ერთ მონაკვეთში საპრეზენტაციო ეკრანზე საქართველოს რუკა გამოჩნდა, სადაც ქართულ ოცნებას წინასაარჩევნოდ დელეგატები ჰყავდა წარმოდგენილი, რომელზეც ოკუპირებული ტერიტორიები გარჩევადი არ იყო. ამ ფაქტს სოცმედიაში უარყოფითი რეაქციები მოჰყვა.

ფოტო: Kakhaber Kemoklidze

ფოტო: George Melashvili

ფოტო: Khatia Dekanoidze

აღსანიშნავია, რომ პირდაპირ ეთერში, რომლებიც ტელევიზიებმა და თავად ქართულმა ოცნებამ გაუშვა, რუკაზე ოკუპირებული ცხინვალი და ოკუპირებული აფხაზეთი, ფაქტობრივად, არ აღიქმებოდა, მაგრამ როგორც მოგვიანებით პაპუაშვილმა ახსნა — ისინი ღია რუხი ფერით იყო აღნიშნული.

"ვინმეს თუ აქვს პრობლემა ფერების აღქმაში, მაშინ მოვუწოდებ, დააკვირდნენ — საქართველოს ის ნაწილები, რომლებიც ოკუპირებულია, არის რუხი ფერით გამოსახული, მის გარშემო არასაქართველოს ტერიტორიები არის თეთრი ფერით გამოსახული. ამიტომ, ესეც აჩვენებს, რა სამარცხვინო ხალხთან გვაქვს საქმე. ვინც მაგას აკეთებს, ეს ადამიანები უბრალოდ ამ ქვეყნის შვილები არ არიან, ჩემი შეფასებით", — ასე უპასუხა შალვა პაპუაშვილმა ბრიფინგზე ჟურნალისტის მიერ დასმულ შეკითხვას ამ პრობლემასთან დაკავშირებით.

პაპუაშვილს Facebook პოსტის საშუალებით გამოეხმაურა ხატია დეკანოიძე და მას "შავ ფულზე მყოფი რუსეთის პროქსი" უწოდა.

"პაპუაშვილს გავულანძღივარ ბრიფინგზე, სადაც საქართველოს ოკუპირებული ტერიტორიების აღიარების რუკის ფონზე იდგა. პატივია, როცა ივანიშვილის რუსულ, შავ ფულზე მყოფი რუსეთის პროქსები გახსენებენ. დღეს, საღამოს 19:00 საათზე რუსთაველზე!", — ვკითხულობთ ხატია დეკანოიძის პოსტში.

ფაქტს Facebook-პოსტით გამოეხმაურა მმართველი პარტიის ლიდერი, მამუკა მდინარაძეც. როგორც შალვა პაპუაშვილმა, პრობლემა მანაც იმ ადამიანებში დაინახა, ვინც "რუხი ფერით გამოსახული" ოკუპირებული რეგიონები ეკრანებიდან ვერ გაარჩია.