საარჩევნო ადმინისტრაციის პრესსპიკერმა, ნათია იოსელიანმა განაცხადა, რომ რუსული მედიაორგანიზაციის წარმომადგენელზე, რუს პროპაგანდისტ ალექსანდრ მილკევიჩზე აკრედიტაცია საარჩევნო კანონმდებლობის დაცვით გაიცა.

მალკევიჩი ვაგნერის ჯგუფთან დაახლოებულ პირად და აშშ-ის მიერ ძებნილად არის გამოცხადებული.

იოსელიანი გავრცელებულ ცნობას იმის შესახებ, რომ ცესკოს თავმჯდომარე გიორგი კალანდარიშვილისა და ალექსანდრ მალევიჩის პირადი ნაცნობობა აქვთ — დეზინფორმაციას უწოდებს.

"ხაზგასმით ვაცხადებთ, რომ რუსული მედიაორგანიზაციის წარმომადგენელზე აკრედიტაცია საარჩევნო კანონმდებლობის დაცვით არის გაცემული. ცესკოს არ აქვს არც უფლებამოსილება და არც წვდომა, ამა თუ იმ პირის სამართლებრივ სტატუსზე, რაც არ განეკუთვნება მის უფლებამოსილების ფარგლებს.

ეს ცნობილია დაინტერესებული მხარეებისთვის და ალბათ, სწორედ ამ დეზინფორმაციის გასამყარებლად გაავრცელეს დოკუმენტი თითქოს, ცესკოს თავმჯდომარე, გიორგი კალანდარიშვილი ვინმე ალექსანდრ მალკევიჩთან ერთად რუსეთში სწავლობდა. დაზუსტებით შეგვიძლია გითხრათ, მათ ერთმანეთთან არანაირი კავშირი არ აქვთ, კალანდარიშვილს არასდროს უსწავლია რუსეთში", — ამბობს იოსელიანი.

ამასთან, გამოცემა ტაბულას ცნობით, ცესკოს არ აქვს ინფორმაცია იმის შესახებ, იმყოფებოდა თუ არა მალკევიჩი არჩევნების დღეს საქართველოში ან საარჩევნო უბნებზე.

საარჩევნო კომისიის ინფორმაციით, რუს პროპაგანდისტს კომისიასთან კომუნიკაცია აკრედიტაციის მიღების შემდეგ არ ჰქონია.