რეპორტიორები საზღვრებს გარეშე აცხადებს, რომ კრემლის პროპაგანდისტი ალექსანდრ მალკევიჩი 2024 წლის საპარლამენტო არჩევნების დღეს თბილისში იმყოფებოდა.

მალკევიჩი ევროკავშირის, ამერიკის, კანადისა და სხვა ქვეყნების მიერაა სანქცირებული და ძებნილად გამოცხადებული. არჩევნებში ჩარევის გამო აშშ-ს მალკევიჩზე ძებნა აქვს გამოცხადებული და $10 მილიონიანი ჯილდო აქვს დაწესებული მასზე ნებისმიერი ინფორმაციისთვის.

საქართველოდ ყოფნას მოწმობს მალკევიჩის მიერ ტელეგრამის არხით გავრცელებული ვიდეო მასალაც და მის მიერ რუსული მედიისთვის მიცემული ინტერვიუებიც. სადაც ჩანს, რომ მალკევიჩი თბილისში 23 ოქტომბერს უკვე იმყოფებოდა, მას ფოტოები აქვს გადაღებული მმართველი პარტიის ქართული ოცნების საარჩევნო კამპანიის დასკვნით ღონისძიებაზე თავისუფლების მოედანზე. მისი ტელეგრამის პირად გვერდზე კი ფოტოებს აქვეყნებს გორში სტალინის მუზეუმისა და მცხეთაში სვეტიცხოვლის ფონზე.

მან რუსულ ტელეგრამ არხთან, საქართველოში გატარებული რამდენიმე დღე გაიხსენა.

"ჩემი თვალით ვნახე რა ხდებოდა, ვიყავი მიტინგებზე, ხალხს გავესაუბრე, საქართველოს საარჩევნო კომისიის მიერ ვიყავი აკრედიტებული", — ამავე ინტერვიუში ის საქართველოს პრეზიდენტს სალომე ზურაბიშვილს "ვადაგასულ პრეზიდენტს" და "უცხოეთის აგენტს" უწოდებს.

არჩევნების შედეგების შეფასების კი ამბობს, რომ "უცნაური ხალხი გამოდის და ამბობს რომ არჩევები არალეგიტიმური იყო, რაიმე მტკიცებულების წარდგენა კი არ შეუძლიათ" .

სანქცირებულ რუს პროპაგანდისტს ალექსანდრ მალკევიჩს, ოკუპაციის შესახებ კანონი აქვს დარღვეული და კანონით, მას საქართველოში შემოსვლა ეკრძალება. ის 2023 წელს დროებით ოკუპირებულ ცხინვალში იმყოფებოდა სადაც ე.წ. პრეზიდენტ გაგლოევს შეხვდა. გაგლოევმა მას "მეგობრობის ორდენიც" გადასცა.

ცნობისთვის, გასულ კვირას საქართველოში არ შემოუშვეს ჩეხი ჟურნალისტი რეი ბეისლი და ფოტოგრაფი, შტეფან გოსი რომლებსაც საპარლამენტო არჩევნების გაშუქება სურდათ.

დოკუმენტში, რომლებიც მან გამოაქვეყნა, უარის მიზეზად მითითებულია ყველაზე ზოგადი პუნქტი: "არ აკმაყოფილებს საქართველოს კანონმდებლობით განსაზღვრულ სხვა მოთხოვნებს".