რუსეთმა და ოკუპირებულმა აფხაზეთმა ხელი მოაწერეს შეთანხმებას, რომელიც რუსულ კომპანიებს ოკუპირებულ აფხაზეთში საინვესტიციო პროექტების განხორციელების საშუალებას აძლევს, — ამის შესახებ ინფორმაციას ეხო კავკაზა ავრცელებს.

სასამართლო გადაწყვეტილებების ურთიერთ აღიარების შესახებ რუსეთ-აფხაზურ შეთანხმების შემდეგ, ოკუპირებული აფხაზეთის ე.წ. ეკონომიკის მინისტრმა, კრისტინა ოზგანმა და რუსეთის ეკონომიკური განვითარების მინისტრმა, მაქსიმ რეშეტნიკოვმა მოსკოვში შეთანხმებას მოაწერეს ხელი, რომლის მიხედვითაც რუსული კომპანიები ოკუპირებულ აფხაზეთში საინვესტიციო პროექტების განხორციელებას შეძლებენ.

რუსეთის ეკონომიკური განვითარების სამინისტროს ცნობით, შეთანხმება მხარეთა უფლებებსა და მოვალეობებს განსაზღვრავს და ოკუპირებულ აფხაზეთში საინვესტიციო საქმიანობით დაკავებული იურიდიული პირებისთვის მხარდამჭერ ზომებს ადგენს.

ამას გარდა, მოსკოვი სოხუმისგან რუს ინვესტორებისთვის შეზღუდვების მოხსნას ითხოვს კომერციული უძრავი ქონების ბაზარზე. ეს უკანასკნელი საზოგადოებაში ე.წ. "აპარტამენტების" კანონითა ცნობილი.

შეგახსენებთ, რომ მიმდინარე წლის 3 სექტემბერს ოკუპირებული აფხაზეთის თვითგამოცხადებული რესპუბლიკის ე.წ. საგარეო საქმეთა სამინისტროს ხელმძღვანელმა, სერგეი შამბამ დაადასტურა, რომ რუსეთმა აფხაზეთს დაფინანსება მიმდინარე წლის 1 სექტემბრიდან შეუჩერა და აფხაზურ მხარეს გარკვეული ვალდებულებების შესრულება მოსთხოვა.

სერგეი შამბა აცხადებდა, რომ "აღებული ვალდებულებების შეუსრულებლობამ გარკვეული სანქციები შეიძლება გამოიწვიოს“.

"ისინი 1-ლი სექტემბრიდან უკვე ამოქმედდება. მოგეხსენებათ, გარკვეული სოციალური დაფინანსება უკვე შეჩერებულია, რაც ეხება ექიმებს, მასწავლებლებს, ძალოვან სტრუქტურებს და სხვა. ეს აშკარად პირველი ნაბიჯებია. გარდა ამისა, დგას საკითხი, რომ ელექტროენერგიის იმ ნაკადში, რომელსაც ყოველ ზამთარში ვიღებთ, კომერციული ფასი უნდა გადავიხადოთ", — განაცხადა შამბამ ბრიფინგზე.

თუ გაინტერესებს მსოფლიოში მიმდინარე მნიშვნელოვანი ამბები, გაწევრიანდით ჯგუფში — რა ხდება მსოფლიოში