უკრაინის შეიარაღებულ ძალებში დამატებით 160000 ჯარისკაცს გაიწვევენ — ამის მიზეზი ქვეყნის აღმოსავლეთით რუსეთის მიერ ბრძოლის ველზე ინიციატივის მოპოვებაა.

რუსეთის არმიამ ბოლო პერიოდში აღმოსავლეთ დონეცკის რეგიონში საგრძნობლად წაიწია წინ. 29 ოქტომბერს გავრცელდა ინფორმაცია, რომ აგრესორებმა სრულად დაიკავეს მაღაროებით განთქმული ქალაქი სელიდოვე. ამ ყველაფრის პარალელურად, ვრცელდება ინფორმაცია, რომ რუსეთში ჩრდილოეთკორეელი სამხედროები ჩავიდნენ.

უკრაინის არმია რამდენიმე კვირაა მნიშვნელოვან ზეწოლას განიცდის, რისი მიზეზიც ცოცხალი ძალისა და რესურსების მიმართულებით რუსების უპირატესობაა.

"არსებული გეგმით, 160000-ზე მეტი ადამიანი გაიწვევა", — განაცხადა უკრაინის ეროვნული უშიშროების საბჭოს მდივანმა, ოლექსანდრ ლიტვინენკომ.

გაწვევა 3 თვის განმავლობაში გაგრძელდება.