აშშ-ის სახელმწიფო დეპარტამენტის პრესსპიკერმა, მეთიუ მილერმა ბრიფინგზე განაცხადა, რომ საქართველოში ჩატარებულ არჩევნებთან დაკავშირებით გამოძიება არა ქართველმა ჩინოვნიკებმა, არამედ საერთაშორისო ორგანომ უნდა ჩაატაროს.

"და გასაგებად რომ ვთქვათ, მე არ მითქვამს ჩემს განცხადებაში, რომ ეს გამოძიება ქართველმა ჩინოვნიკებმა უნდა ჩაატარონ. ჩვენ კონსულტაციები გვაქვს ევროპელ პარტნიორებთან იმის შესახებ, თუ რომელი ორგანი შეიძლება იყოს შესაფერისი ასეთი გამოძიების ჩასატარებლად," — განაცხადა მეთიუ მილერმა.

მისი თქმით, აშშ-ს პასუხებს საქართველოს მოქმედებები განსაზღვრავს.

"ჩვენს პასუხებს საქართველოს მოქმედებები განსაზღვრავს. უკვე რამდენიმე თვეა საქართველოსთან ჩვენი ურთიერთობების გადახედვა მიმდინარეობს. ჩვენ უკვე შევაჩერეთ 95 მილიონი დოლარის ოდენობის დახმარება საქართველოს მთავრობისთვის და ჩვენ სხვა დახმარება გვაქვს, რომელიც განხილვის პროცესშია", — განაცხადა მეთიუ მილერმა.

მანამდე აშშ-ის სახელმწიფო დეპარტამენტის პრესსპიკერმა განაცხადა, რომ აშშ-ის სახდეპი უერთდება მოწოდებას საქართველოს არჩევნებზე დარღვევების სრული გამოძიების შესახებ.

"ჩვენ ვუერთდებით საერთაშორისო და ადგილობრივი დამკვირვებლების მოწოდებებს არჩევნებთან დაკავშირებული დარღვევების შესახებ ყველა ცნობა სრულად იქნეს გამოძიების და მოვუწოდებთ პატივისცემის გამოხატვას ფუნდამენტური თავისუფლებისა და მშვიდობიანი შეკრების მიმართ", — თქვა მილერმა.