თბილისში შუქრუთელების თითქმის 2 თვიანი პროტესტი დასრულებულია.

პროტესტის მონაწილეები უკან, შუქრუთში, ბრუნდებიან და ამბობენ, რომ ათი წელიც რომ გაგრძელდეს მზად არიან იბრძოლონ თავიანთი სიმართლის დასამტკიცებლად.

სოფელ შუქრუთის მოსახლეობის ნაწილი 11 სექტემბერს თბილისში ჩამოვიდა. მათ პარლამენტის მიმდებარე ტერიტორიაზე, პროტესტის ნიშნად, კარვის გაშლა სცადეს, თუმცა მათ ამის უფლება პოლიციამ არ მისცა, შედეგად (24 ოქტომბრამდე) პროტესტის მონაწილეები ღია ცის ქვეშ ათევდნენ ღამეს.

შუქრუთელების უმრავლესობა პროტესტის უკიდურეს ფორმას, შიმშილობას მიმართავდა, ვიდრე არაერთი საპროტესტო აქციისა და მოწოდების შემდეგ მათთან ქართული ოცნების დეპუტატი, ადამიანის უფლებათა კომიტეტის თავმჯდომარე რატი იონათამიშვილი არ მივიდა და კომპანია ჯორჯიან მანგანეზის წარმომადგენლებთან შუამავლობის პირობა აღუთქვა.

კომპანიის წარმომადგენლებთან მოლაპარაკებების პროცესი დაიწყო, თუმცა ის მალევე უშედეგოდ დასრულდა.

ერთ-ერთი შუქრუთელის გიორგი ნეფარიძის თქმით, მოლაპარაკებების პროცესმა დაუტოვა განცდა, რომ ის სიტუაციის არჩევნებამდე "გადაგორებას" უფრო ემსახურებოდა ვიდრე რაიმე შედეგის მოტანას პროტესტის მონაწილეებისთვის.

საბოლოოდ, დღეს 24 ოქტომბერს შუქრუთელებმა პარლამენტის მიმდებარე ტერიტორია დატოვეს, თუმცა უწყვეტი პროტესტი კვლავ გრძელდება.

შუქრუთელების პროტესტის შესახებ დეტალურ ინფორმაციას გაეცნობი აქ.