უფლებადამცველთა გაერთიანება - ადამიანის უფლებათა ცენტრი მოუწოდებს შსს-ს
შეკრებებზე და მანიფესტაციებზე მხოლოდ ფორმიანი და იდენტიფიცირებადი პოლიციელები მიავლინოს.


უფლებადამცველების განცხადებით, 2024 წელს ადამიანის უფლებათა ცენტრის მონიტორებმა, სხვადასხვა შინაარსისა და ფორმის საპროტესტო აქციებზე დაკვირვებისას, გამოავლინეს გამოიკვეთა აქციის/მანიფესტაციის მიმდინარეობის პროცესში ყველა სახის საპოლიციო ძალის გამოყენების ტენდენცია. საქართველოს პარლამენტში ინიცირებული რუსული კანონის საწინააღმდეგო აქციების დროს დაკვირვების შედეგად, უფლებადამცველთა გაერთიანების მტკიცებით, პროცესში ჩართული იყვნენ სამართალდამცველები, რომელთა იდენტიფიცირება შეუძლებელი იყო.

"საპროტესტო აქციებზე ფორმიან პოლიციელებთან ერთად წარმოდგენილი იყვნენ, სავარაუდოდ, სამართალდამცავი პირები სამსახურებრივი უნიფორმის გარეშე, რომელთა
იდენტიფიცირებაც შეუძლებელი იყო. ამასთან არაიდენტიფიცირებადი პირები,
კომუნიკაციაში იყვნენ სხვა ფორმიან პოლიციელებთან, ახდენდნენ აქციის აქტიური
მონაწილეების, ორგანიზატორების ფოტო და ვიდეო გადაღებას, აწვდიდნენ ამ
ინფორმაციას ხელმძღვანელ პირებს, რის შემდეგაც იწყებოდა აქციის მონაწილეთა
მიზანმიმართული დევნა-დაკავება და ხშირ შემთხვევაში — ფიზიკური ძალადობა", — ნათქვამია უფლებადამცველთა გაერთიანების მიერ გავრცელებულ განცხადებაში.

ადამიანის უფლებათა ცენტრის შეფასებით, მნიშვნელოვანია, რომ ის
სამართალდამცავები, რომლებიც ჩართულები არიან საპროტესტო აქციების
მშვიდობიანად ჩატარების ორგანიზებაში, აქციის მიმდინარეობისას იყვნენ ნათლად და
ინდივიდუალურად იდენტიფიცირებადი. რაც, მათი აზრით, ხელს შეუწყობს აქციაზე წარმოდგენილი პოლიციელების პასუხისმგებლობისა და ანგარიშვალდებულების გაზრდას, რადგანაც ასეთ პოლიციელებს აქვთ განცდა, რომ ისინი არიან დაკვირვების ქვეშ და თუკი
დაარღვევენ კანონის მოთხოვნებს, შესაძლებელია დადგეს მათი პასუხისგებაში
მიცემის საკითხი.
უფლებადამცველთა გაერთიანება — ადამიანის უფლებათა ცენტრი მოუწოდებს შინაგან საქმეთა სამინისტროს შეკრებისა და მანიფესტაციის ფასილიტაციის პროცესში უზრუნველყოს ფორმიანი და იდენტიფიცირებადი პოლიციელების მონაწილეობა.