მედიის განვითარების ფონდის მიერ გაანალიზებულ და გასაჯაროებული შედეგების მიხედვით, იდენტიფიცირებული ასობით გვერდი, პორტალი და სააგენტო, რომელიც ანტიდასავლურ პროპაგანდით და ოპოზიციის დისკრედიტაციით არის დაკავებული.

მედიის განვითარების ფონდის აღმასრულებელმა დირექტორმა, თამარ კინწურაშვილმა თქვა, რომ სახელისუფლებო ჯგუფი სპეკულირებს ძირითადად სამი თემით, ესენია; სუვერენული დემოკრატია, გლობალური ომის პარტია და ომის შიშების თავს მოხვევა.

"სამი თემაა, რომელზეც ცდილობს ძირითადად სახელისუფლებო ჯგუფი საზოგადოებრივი აზრის კონსოლიდირებას. ეს არის სუვერენული დემოკრატია, ეს არის გლობალური ომის პარტია და ომის შიშების თავს მოხვევა და იდენტობის დაცვის საკითხი. ქართულ ოცნებასთან დაკავშირებული ფბ ანგარიშები თუ ჯგუფები ძირითადად დასავლური კონსერვატორული იდეების პოპულარიზების გზით ცდილობენ საკუთარი დღის წესრიგის გამართლებას და აქ ხშირად ნახავთ, მაგალითად, როგორც ორბანს, რომელიც ასევე გლობალური ომის პარტიის თემატიკით სპეკულირებდა, ასევე ნახავთ კრემლის პროპაგანდისტულ ინგლისურენოვან ე.წ. ექსპერტებს", — თქვა კინწურაშვილმა.

ფონდის ერთ-ერთი წარმომადგენლის მტკიცებით, წინასაარჩევნოდ, ჯამში გამოვლინდა პროპაგანდისტის გამავრცელებელი 25 ახალი შემთხვევა, რომელთაგან უმეტესობა — 19 შემთხვევა მიმართული იყო სწორედ ოპოზიციის წინააღმდეგ.

"გამოვავლინეთ 25 ახალი შემთხვევა. უმეტესობა, 19 შემთხვევა მიმართული იყო ოპოზიციის, ხოლო 6 ქართული ოცნების წინააღმდეგ. წინასაარჩევნო პერიოდში შეიქმნა ახალი ფბ გვერდები და ანგარიშები, რომლებიც აქვეყნებდნენ ვიდეოებს ძირითადად არქივიდან სხვადასხვა ვიდეომანიპულაციებს, ასევე გენდერულ დეზინფორმაციას", — ამბობს ფონდის წარმომადგენელი.

2024 წლის სამთვიანი მონიტორინგის შედეგებით, უკვე გამოაშკარავდა 4 ათასზე მეტი გზავნილი და კომენტარი სოციალურ ქსელში, რომელიც დაკავშირებულია მმართველ პარტიასთან და რომელთა მიზანიც ევროკავშირის, არასამთავრობო სექტორის და ოპოზიციის დისკრედიტაციას წარმოადგენს.