NBC-ის ინფორმაციით, ყოფილ პროდიუსერს ჰარვი ვაინშტაინს, რომელიც სექსუალური ძალადობისთვის სასჯელს ნიუ-იორკში იხდის, ონკოლოგიური დაავადება აღმოუჩინეს.

ვაინშტაინს ქრონიკული მიელოიდური ლეიკოზი აღმოუჩნდა — დაავადება, რომელიც ძვლის ტვინს აზიანებს. შედეგად, ადამიანი მუდმივ დაღლილობას გრძნობს, დაკარგული აქვს მადა და აქვს ძლიერი ძვლების ტკივილი. ლეიკოზის ეს ფორმა ნელა ვითარდება,ხოლო დავადების აღმოჩენის საშუალო ასაკი 64 წელია. დროსთან ერთად პაციენტის ჯანმრთელობის მდგომარეობაც მძიმდება.

2024 წლის ივლისში ვაინშტაინმა Covid-19-იც მძიმედ გადაიტანა. ყოფილ პროდიუსერს ფილტვებიდან სისხლის ამოსაღებად ოპერაცია ჩაუტარდა.

ვაინშტაინის ყოფილი ადვოკატების გავრცელებული ინფორმაციით, 10 სექტემბერს ყოფილ პროდიუსერს გულის სასწრაფო ოპერაციის გასაკეთებლად ნიუ-იორკის საავადმყოფოში გადაყვანა მოუწიათ.

ჰოლივუდის ერთ-ერთი ყველაზე გავლენიანი პროდიუსერი ნიუ-იორკის სასამართლომ გაუპატიურებასა და სექსუალურ ძალადობაში 2020 წელს დამნაშავედ ცნო და 23-წლიანი პატიმრობა მიუსაჯა.