აშშ-ის ყოფილი პრეზიდენტის, დონალდ ტრამპის თქმით, ისრაელის პრემიერმინისტრს ბენიამინ ნეთანიაჰუს იმის გამო აქვს ომში უკეთესი მდგომარეობა, რომ აშშ-ის პრეზიდენტის ჯო ბაიდენის რჩევები უგულებელყო.

პენსილვანიაში გამართულ შეხვედრაზე, ტრამპმა თქვა რომ ღაზაში ჰამასის და ლიბანში ჰეზბოლას წინააღმდეგ ომთან დაკავშირებით, ბაიდენმა ნეთანიაჰუს უთხრა — "ნუ გააკეთებ ამას, არ გააკეთო".

"ბიბიმ მას არ მოუსმინა და გეტყვით, ისინი ახლა ბევრად უფრო ძლიერ მდგომარეობაში არიან, ვიდრე სამი თვის წინ... მსგავსი არავის უნახავს", — თქვა ტრამპმა. სავარაუდოდ, ის გულისხმობდა ტერორისტული ორგანიზაციების ლიდერების მკვლელობების სერიას.

აშშ-ის ყოფილი პრეზიდენტის ინფორმაციით ის ნეთანიაჰუს შაბათს ესაუბრა.

"[ნეთანიაჰუმ] თქვა: წარმოუდგენელია ის, რაც მოხდა. და მე ვუთხარი: საკმაოდ წარმოუდგენელია. მაგრამ ის არ მოუსმენდა ბაიდენს, რადგან რომ მოესმინა, ისინი არ იქნებოდნენ ამ მდგომარეობაში", – თქვა ტრამპმა.

მან თავისი ოპონენტი, ვიცე-პრეზიდენტი კამალა ჰარისიც ახსენა და თქვა რომ ის ბაიდენზე უარესია.

"ის [ბაიდენზე] უარესია, ის არ არის ისეთი ჭკვიანი, როგორიც ის, და მე არ ვამბობ, რომ ის ყველაზე ჭკვიანია… მაგრამ ის არ არის ისეთი ჭკვიანი, როგორიც ისაა [ბაიდენი]", — განაცხადა ტრამპმა.

ისრაელის პრემიერმინისტრის სპიკერმა დაადასტურა ტრამპთან საუბარი და თქვა, რომ ნეთანიაჰუმ "გაიმეორა ის, რაც მან საჯაროდ თქვა: ისრაელი ყურადღებიანია იმ საკითხებზე, რასაც ამერიკის მთავრობა აყენებს, მაგრამ საბოლოოდ გადაწყვეტილებებს საკუთარი ეროვნული ინტერესების გათვალისწინებით მიიღებს".