20 ოქტომბერს თბილისში მსვლელობა "საქართველო ირჩევს ევროკავშირს" გაიმართა. მსვლელობის მონაწილეები ხუთი სხვადასხვა ლოკაციიდან თავისუფლების მოედნისკენ გაემართნენ, სადაც, საბოლოოდ, აქცია გაიმართა.

შეკრებილ ხალხს სცენიდან მიმართა სალომე ზურაბიშვილმაც. საქართველოს პრეზიდენტმა ქართველი ამომრჩევლის გარდა, მიმართა ვოლოდიმირ ზელენსკის და მას გამარჯვება უსურვა. ასევე, ზურაბიშვილის მიმართვის ადრესატი იყო მაია სანდუც.

პრეზიდენტის გამოსვლას ინციდენტის არ ჩაუვლია — სალომე ზურაბიშვილს თავისუფლების მოედნის მიმდებარე სასტუმრო "მონოგრაფის" ვერანდიდან ლაზერებს ანათებდნენ. შესაბამისი ვიდეო Facebook-ზე მარიამ გეგუჩაძემ გაავრცელა.

აქციის მონაწილეები ვერანდაზე ლაზერების მიმნათებლების მხილების მიზნით ავიდნენ. სასტუმრო "მონოგრაფი" ქართული ოცნების დეპუტატს, საარჩევნო სიის 37-ე ნომერს ანტონ ობოლაშვილს ეკუთვნის. როგორც პუბლიკა წერს, ლაზერიანთაგან ერთ-ერთი ქართული ოცნების ვაკის ახალგაზრდული ორგანიზაციის თავმჯდომარე, საბა გორგაძე იყო.

დღეს, 21 ოქტომბერს ბრიფინგი გამართა გახარია საქართველოსთვის ერთ-ერთმა ლიდერმა, ნათია მეზვრიშვილმაც, რომელმაც აღნიშნა, რომ ამ ინციდენტში მონაწილე პირები, 9 ოქტომბერს მისი პარტიის წარმომადგენლებს დაესხნენ თავს.

"ჩვენი დღევანდელი ბრიფინგი წინასაარჩევნოდ ჩადენილ დანაშაულებს ეძღვნება. მინდა გითხრათ, რომ ქართული ოცნება არის დამარცხებული, იმიტომ, რომ მსგავს დანაშაულებს დამარცხებული ხელისუფლებები ჩადიან", — განაცხადა ნათია მეზვრიშვილმა.

შინაგან საქმეთა სამინისტრო / Ministry of Internal Affairs of Georgia ❗️❗️❗️

ირაკლი კობახიძემ 21 ოქტომბერს აღნიშნულ პირებს "სამოქალაქო აქტივისტები" უწოდა.

"შეიძლება პარტიის წევრებიც იყვნენ მათი ნაწილი, მაგრამ ისინი არიან სამოქალაქო აქტივისტები. როგორც იგორ ნარმანია და სხვა ნაციონალი ახალგაზრდები იყვნენ გულწრფელი სამოქალაქო აქტივისტები, ასევე რატომ არის გამორიცხული, რომ ქართული ოცნების ახალგაზრდული ორგანიზაციის წევრი იყოს სამოქალაქო აქტივისტი", — განაცხადა კობახიძემ