პრეზიდენტ სალომე ზურაბიშვილის თანამდებობიდან იმპიჩმენტის წესით გადაყენების საკითხზე უმრავლესობა საკონსტიტუციო წარდგინებას საკონსტიტუციო სასამართლოში დღეს გზავნის.

იმპიჩმენტის მოთხოვნის დოკუმენტს ქართული ოცნების 81 წევრი აწერს ხელს.

პარლამენტის საპროცედურო საკითხთა და წესების კომიტეტმა პრეზიდენტის იმპიჩმენტთან დაკავშირებულ კონსტიტუციურ წარდგინებაზე პარლამენტის წევრების ხელმოწერები შეამოწმა და მათი ნამდვილობა დაამტკიცა.

"საქართველოს პარლამენტის საპროცედურო საკითხთა და წესების კომიტეტმა 2024 წლის 21 ოქტომბრის კომიტეტის სხდომაზე, საქართველოს პარლამენტის რეგლამენტის 178-ე მუხლის მესამე პუნქტის შესაბამისად, განიხილა კონსტიტუციურ წარდგინებაზე განსახორციელებელი საქართველოს პარლამენტის წევრების ხელმოწერების ნამდვილობის შემოწმების შედეგები, რომელიც ეხებოდა საქართველოს პრეზიდენტის იმპიჩმენტის წესით თანამდებობიდან გადაყენების საკითხის აღძვრის უფლების განხორციელებას. შემოწმების შედეგად დადგინდა საქართველოს პარლამენტის 81 წევრის ხელმოწერის ნამდვილობა, რაც შეესაბამება საქართველოს კონსტიტუციის 48-ე მუხლის პირველი პუნქტითა და საქართველოს პარლამენტის რეგლამენტის 178-ე მუხლის პირველი პუნქტით დადგენილი ხელმოწერების რაოდენობას, პარლამენტის სრული შემადგენლობის არანაკლებ ერთი მესამედი", – განაცხადა საპროცედურო საკითხთა და კომიტეტის თავმჯდომარე ირაკლი ქადაგიშვილმა.

პროცედურის მიხედვით, კომიტეტის მიერ ხელმოწერების ნამდვილობის დადგენის შემდეგ, სარჩელი საკონსტიტუციო სასამართლოს გადაეცემა.

ქართული ოცნება სალომე ზურაბიშვილს საქართველოს კონსტიტუციის 52-ე მუხლის "ა" ქვეპუნქტის დარღვევაში ადანაშაულებს, რომლის მიხედვით, პრეზიდენტი წარმომადგენლობით უფლებამოსილებებს საგარეო ურთიერთობებში მთავრობის თანხმობით ახორციელებს.

საქართველოს პრეზიდენტის, სალომე ზურაბიშვილის იმპიჩმენტი მმართველმა პარტიამ მეორედ დააყენა. განცხადება ამის შესახებ პარლამენტის თავმჯდომარემ, შალვა პაპუაშვილმა 7 ოქტომბერს გააკეთა.

მან განაცხადა, რომ საპარლამენტო უმრავლესობამ მიიღო გადაწყვეტილება, ხელახლა აღძრას სალომე ზურაბიშვილის იმპიჩმენტის პროცედურა. მისი თქმით, "კონსტიტუციის დამრღვევ სალომე ზურაბიშვილს უნდა დარჩეს არა ყოფილი პრეზიდენტის, არამედ გადაყენებული პრეზიდენტის სტატუსი".

პრეზიდენტმა სალომე ზურაბიშვილმა ჟურნალისტების კითხვას, თუ რას ეტყოდა მმართველ პარტიას იმაზე, რომ ისინი ხელახლა იწყებენ მისი იმპიჩმენტის პროცედურას, მხოლოდ ერთი სიტყვით უპასუხა — "არაფერს".

პრემიერმინისტრის, ირაკლი კობახიძის განცხადებით, ქართული ოცნება პრეზიდენტს იმპიჩმენტის წესით ერთ თვეში გადააყენებს.