პალესტინელთა რადიკალური დაჯგუფება ჰამასი ადასტურებს ჰამასის ლიდერის, იაჰია სინვარის მკვლელობას. ინფორმაციას ამის შესახებ ალ ჯაზირა ავრცელებს.

ჰამასის ერთ-ერთი ლიდერის, ხალილ ჰაიას განცხადებით, იაჰია სინვარი ღაზის სექტორში ისრაელის წინააღდეგ ბრძოლაში დაიღუპა, ის სიცოცხლის ბოლო წუთამდე ისრაელის წინააღმდეგ იბრძოდა. ჰამასის წარმომადგენელმა აღნიშნა, რომ ღაზაში მყოფი 101 ტყვე არ დაბრუნდება, ვიდრე ისრაელი არ შეწყვეტს თავდასხმებს ღაზაზე და არ გაიყვანს თავის ძალებს ალყაში მოქცეული ანკლავიდან.

მისივე თქმით, სინვარის სიკვდილი მხოლოდ ჰამასის გაძლიერებას გამოიწვევს და ისრაელი მის მოკვლას ინანებს.

ალ ჯაზირა წერს, რომ შენობას, სადაც სინვარი იმყოფებოდა, ტანკის ჭურვები და რაკეტაც ესროლა.

სამხედროებმა გაავრცელეს კადრები, სადაც ჩანს მძიმედ დაჭრილი, სკამზე მჯდომი სინვარი დანგრეულ შენობაში, რომელსაც სახე შარფით აქვს დაფარული.

ისრაელის ჯარის ოფიციალური წარმომადგენელი, დანიელ ჰაგარი აცხადებს, რომ სინვარი იპოვეს იარაღით, ტყვიაგაუმტარი ჟილეტით და 40 000 შეკელით (10 731,63 დოლარი). სტომატოლოგიური ჩანაწერებით, თითის ანაბეჭდებით და დნმ-ის ანალიზით მისი მკვლელობა საბოლოოდ დადასტურდა.