საქართველოს პრემიერმინისტრის, ირაკლი კობახიძის განცხადებით, კულტურისა და სპორტის ახალი მინისტრი თინათინ რუხაძე იქნება. მან ამ პოსტზე თეა წულუკიანი შეცვალა, რომელმაც თანამდებობის დატოვების შესახებ განცხადება 25 სექტემბერს, გიზო ჟორდანიას საიუბილეო საღამოზე სიტყვით გამოსვლისას გააკეთა.

პრემიერის თქმით, არჩევნების შემდეგ დააინიცირებენ საკანონმდებლო ცვლილებას, რომლის მიხედვითაც მოხდება სამინისტროს გაყოფა და ცალკე იქნება კულტურის და ცალკე სპორტის სამინისტრო.

"მინდა წარმოგიდგინოთ კულტურისა და სპორტის მინისტრი. ვიდრე სამინისტრო გაიყოფა, იქნება ერთი მინისტრი, გვინდა წარმოგიდგინოთ ქალბატონი თინათინ რუხაძე. 1989 წლიდან ის გახლდათ საქართველოს ახალგაზრდა შემოქმედებითი გაერთიანების დირექტორის მოადგილე, კამერული ორკესტრის, თბილისის კონცერტინოს დირექტორი, ასევე ის იყო ტელე-ფესტივალ „მანას“ აღმასრულებელი დირექტორი, მოგვიანებით ტიბისი ტვ-ის გენერალური პროდიუსერი, ასევე გახლდათ საქტელე-რადიო მაუწყებლობის პროდიუსერთა საბჭოს აპარატის უფროსი და პროდიუსერი. იყო ასევე შპს „მელოდია არტის“ დირექტორის მოადგილე, გენერალური პროდიუსერი, ასევე თბილისის ვასო აბაშიძის სახელობის მუსიკისა და დრამის თეატრის გენერალური დირექტორი, იყო თბილისის მუნიციპალიტეტის საკრებულოს მრჩეველი განათლებისა და კულტურის საკითხებში. 2016 წლიდან დღემდე ის გახლდათ მოსწავლე-ახალგაზრდობის ეროვნული სასახლის დირექტორი" - განაცხადა პრემიერმა.

პრემიერის თქმით, კულტურისა და სპორტის მინისტრის პირველი მოადგილე, სპორტის სამინისტროს ცალკე გამოყოფის შემდეგ კი სპორტის მინისტრის თანამდებობას – შალვა გოგოლაძე დაიკავებს.

"მინდა, წარმოგიდგინოთ შალვა გოგოლაძე, რომელიც ამ ეტაპზე დაიკავებს მინისტრის პირველი მოადგილის თანამდებობას. ის იქნება სპორტის კურატორი კულტურისა და სპორტის სამინისტროში, ხოლო მას შემდეგ, რაც სპორტის სამინისტრო გამოიყოფა, ის დაიკავებს სპორტის მინისტრის თანამდებობას. ასეთია ჩვენი პოლიტიკური გუნდის გადაწყვეტილება", – განაცხადა ირაკლი კობახიძემ.