თენგიზ ცერცვაძის სახელობის ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრი გაიხსნა. სამედიცინო ცენტრი დიღომში, ლუბლიანას ქუჩა N70 -ში განთავსდა.

შენობის ყოფილი მესაკუთრეა შპს "სამედიცინო ინოვაციების ცენტრი", რომლისგანაც საქართველოს მთავრობამ ეს უძრავი ქონება შეიძინა. ინფექციური საავადმყოფოსთვის შეძენილი ახალი შენობის რემონტი და მისი აღჭურვის სამუშაოები სამშენებლო კომპანია "ანაგმა" განახორციელა.

ჯანდაცვის უწყების ცნობით, ახალი ინფექციური საავადმყოფო 83 საწოლზეა გათვლილი. ახალ შენობაში, კლინიკას გადაუდებელი ამბულატორიული განყოფილება დაემატა. პაციენტებს ადგილზე ყველა საჭირო-სავალდებულო კვლევების ჩატარების შესაძლებლობა აქვთ. საერთო ჯამში, კლინიკაში, 352 თანამშრომელია დასაქმებული.

ცნობისთვის, თბილისის ინფექციური საავადმყოფოს ახალი შენობის სარემონტო სამუშაოებისთვის შესაბამისი ხელშეკრულება კონტრაქტორ კომპანია "ანაგთან" 2022 წლის მარტში გაფორმდა, ადგილზე სამუშაოები 14 თვეში, 2023 წლის 25 მაისს უნდა დასრულებულიყო. თუმცა კონტრაქტორმა კომპანიამ ვადების გახანგრძლივებას ითხოვა.

თბილისის ინფექციური საავადმყოფო 1953 წელს დაარსდა. 1989 წელს, თბილისის ინფექციურ საავადმყოფოში შეიქმნა შიდსის განყოფილება, რომლის ხელმძღვანელადაც დაინიშნა თენგიზ ცერცვაძე. 2001 წელს კლინიკას ეწოდა "ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრი", რომლის გენერალურ დირექტორად გახდა თენგიზ ცერცვაძე. ის სიცოცხლის ბოლომდე ხელმძღვანელობდა დაწესებულებას. კლინიკას სახელწოდება 2024 წელს, გენერალური დირექტორის, პროფესორ თენგიზ ცერცვაძის გარდაცვალების შემდეგ შეეცვალა და მას თენგიზ ცერცვაძის სახელობის ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრის სახელი მიენიჭა.