მმართველი პარტიის, ქართული ოცნების ინიციატივას, რომ განახლდეს დიალოგი საკონსტიტუციო ცვლილებებზე, ოპოზიციის ნაწილი ემხრობა, მათ შორის ევროპული საქართველო და ერთიანი ნაციონალური მოძრაობა.

ევროპული საქართველოს წევრი სერგი კაპანაძე ამბობს, რომ მისი პარტია მზად არის დიალოგზე და შესაბამისად გუნდი მონაწილეობას მიიღებს ამ პროცესში:

"ახლაც მზად ვართ, რომ მათთან ერთად განვიხილოთ მნიშვნელოვანი საკითხები. ოღონდ უნდა გვახსოვდეს რა არის ეს მნიშვნელოვანი საკითხები და რაზე არის საზოგადოებრივი დაკვეთა დიალოგთან დაკავშირებით. ეს არის პროპორციული საარჩევნო სისტემა, რომელიც ფუნდამენტურად მნიშვნელოვანია, რომ მყისიერად შევიდეს ძალაში. ეს არის ამ სისტემასთან დაკავშირებით სხვადასხვა დეტალები და მათ შორის ყველაზე მნიშვნელოვანი არის გაუნაწილებელი მანდატების საკითხი და ჩვენ ვთავაზობთ ქართულ ოცნებას, რომ ნებისმიერი ევროპული მოდელი რომელიც მოქმედებს, მათ შორის დონტის მოდელი, ვებსტერის თუ სხვა მოდელები იყოს განხილული".

ერთიანი ნაციონალური მოძრაობის წევრი ნიკა რურუა ამბობს, რომ ისინიც ჩაერთვებიან დიალოგის პროცესში, თუკი ეს იქნება რეალურ პროცესებზე, ქვეყნის ინტერესებზე მორგებული და გამოწვევების გათვალისწინებით შესაქმნელი დოკუმენტი.

მმართველი პარტიის, ქართული ოცნების ლიდერმა არჩილ თალაკვაძემ კვალიფიციურ ოპოზიციურ პარტიებს, მომდევნო კვირაში შეკრება და საკონსტიტუციო რეფორმაზე მსჯელობის განახლება შესთავაზა.