პირველი სექტემბრიდან ბაქო-თბილისი-ბაქოს საჰაერო ხაზზე რეგულარულ რეისებს აზერბაიჯანული დაბალბიუჯეტიანი ავიაკომპანია Buta Airways შეასრულებს.

ეკონომიკისა და მდგრადი განვითარების სამინისტროს ცნობით, ახალი კომპანია აზერბაიჯანულ ავიახაზებს, AZAl-ს ჩაანაცვლებს. თავდაპირველად ავიაკომპანიები ოთხ სიხშირეზე ჩანაცვლდებიან, ხოლო 29 ოქტომბრიდან, ყველა რეისს Buta Airways შესრულებს.

სამინისტროს ინფორმაციით, საქართველოსა და აზერბაიჯანის დედაქალაქებს შორის, ასევე, გაიზრდება ავიამიმოსვლის სიხშირე და 10-ის ნაცვლად, კვირაში 14 სიხშირით (დღეში ორჯერ) Embraer E190 / E170 ტიპის საჰაერო ხომალდებით განხორციელდება.

Buta Airways ავიაკომპანია აზერბაიჯანის ავიახაზების (AZAL) სტრუქტურის ქვეშ შექმნილი ავიაკომპანიაა, რომელიც დაფუძნებულია დაბალტარიფიან (Low Cost) მოდელზე. ის სამგზავრო საავიაციო მიმოსვლის დაწყებას პირველი სექტემბრიდან გეგმავს.