ტელეკომპანია იმედმა გაავრცელა განცხადება, სადაც უარს ამბობს ოპოზიციური პარტიების წინასაარჩევნო სარეკლამო ვიდეორგოლების საკუთარ პლატფორმებზე განთავსებაზე.

იმედი გადაწყვეტილების მიზეზად მთავარი არხის, ტვ პირველისა და ფორმულას გადაწყვეტილებას ასახელებს, სადაც სამი კრიტიკული მედია უარს ამბობს ქართული ოცნების წინასაარჩევნო ვიდეორგოლების ეთერში გაშვებაზე.

იმედის მტკიცებით, ოპოზიციური მედიები "მოგონილი არგუმენტებით უარს ამბობენ თავიანთ ეთერში განათავსონ კანონის მოთხოვნების დაცვით მომზადებული ვიდეორგოლები".

ტელეკომპანია იმედის განცხადებაში ვკითხულობთ პაველ ჰელჩინსკის მოწოდებასაც.

"როგორც საქართველოში ევროკავშირის ელჩმა, ბატონმა პაველ ჰერჩინსკიმ განაცხადა, "თავისუფალი მედიის გადასაწყვეტია, რა გადაწყვეტილებას მიიღებს...". მიუხედავად იმისა, რომ ტელეიმედს აქვს მკაფიოდ გაცხადებული სარედაქციო პოლიტიკა — არ დაუშვას ნაციონალური მოძრაობის დაბრუნება ხელისუფლებაში, რაც ქვეყანას სრულ კატასტროფამდე მიიყვანს, ჩვენ დღემდე ვუშვებდით მათ მიერ მოწოდებულ ვიდეორგოლებს", — წერია განცხადებაში.

იმედი იუწყება, რომ იქამდე სანამ კრიტიკული მედიები არ შეასრულებენ მოთხოვნას და არ დაუთმობენ საეთერო დროს ქართული ოცნების ვიდეორგოლს, მაშინ ტელეკომპანია იმედიც უარს აცხადებს ოპოზიციური პარტიების ვიდეორგოლების განთავსებაზე.

"სანამ არ აღმოიფხვრება ნაციონალური მოძრაობის მედიასაშუალებების მიერ შექმნილი დისბალანსი (რეიტინგების, მათ მიერ რეკლამის გაუშვებლობით გაცდენილი საათების და სხვა ობიექტური კრიტერიუმების გათვალისწინებით) და უზრუნველყოფილი არ იქნება კონკურენტული საარჩევნო გარემო ამ მიმართულებით, ეთერში აღარ განვათავსებთ კოლექტიური ნაციონალური მოძრაობის იმ პარტიების სარეკლამო ვიდეორგოლებს, რომლებიც წარმოადგენენ წინა ხელისუფლების დანაშაულებრივ სახეს", — წერს იმედი.

შეგახსენებთ, რომ კრიტიკულმა მედიებმა უარი თქვეს, საეთერო დრო დაეთმოთ ქართული ოცნების მიერ გავრცელებული საარჩევნო კლიპისთვის, სადაც ომისგან დანგრეული უკრაინის კადრებია გამოყენებული.