სლოვაკეთის პრემიერმინისტრმა, რობერტ ფიცომ ჟურნალისტებს "სისხლისმსმელი ნაბიჭვრები" უწოდა და ახალი შეზღუდვების დაწესებით დაემუქრა, მათ შორის — ეროვნული მედიის მაკონტროლებელი ორგანოს შექმნით, რასაც მთავრობის მხრიდან ცენზურის მცდელობად აფასებენ. ამის შესახებ გამოცემა Politico წერს.

ფიცომ ეს განცხადება მას შემდეგ გააკეთა, რაც პრესკონფერენციაზე ჟურნალისტმა მმართველ კოალიციაში დაძაბულობის შესახებ ჰკითხა.

"საპარლამენტო არჩევნების შედეგების პირველივე დღიდან თქვენ ერთი წუთითაც არ მოგვასვენეთ. თქვენ სისხლისმსმელი ნაბიჭვრებივით დაგვესხით თავს", – განაცხადა ფიცომ.

როგორც მედია წერს, რობერტ ფიცომ მსხვილი დამოუკიდებელი სლოვაკური მედიასაშუალებებთან, რომლებიც მის მთავრობას აკრიტიკებდნენ, ყოველგვარი კომუნიკაცია შეწყვიტა.

სლოვაკეთის პრემიერმინისტრმა განაცხადა, რომ მხარს უჭერს ეროვნული მედია ორგანოს შექმნის იდეას და სანქციების დაწესებას იმ ჟურნალისტებისთვის, რომლებიც მცდარი ინფორმაციის შემცველი სტატიების შესწორებაზე უარს ამბობენ. მისივე თქმით, ყველა ჟურნალისტმა უნდა გაიაროს გადამზადების კურსები.

სლოვაკეთის პრემიერ-მინისტრის ეს განცხადებები ოპოზიციონერმა პოლიტიკოსებმა ცენზურისა და მედიის შეზღუდვის მცდელობად შეაფასეს.