აშშ-ში დააკავეს მამაკაცი, რომელიც, სავარაუდოდ, არჩევნების დღეს ისლამური სახელმწიფოს სახელით ტერაქტს ამზადებდა.

პროკურატურის ცნობით, 27 წლის ნასირ აჰმად ტავჰედი ავღანეთის მოქალაქე იმიგრანტია, რომელიც 2021 წლის სექტემბრიდან ოკლაჰომა-სიტიში ცხოვრობს.

"ეჭვმიტანილი, სავარაუდოდ, ISIS-ის იდეებით შთაგონებული, აპირებდა ჩვენს სამშობლოში არჩევნების დღეს ძალადობრივი თავდასხმა მოეწყო", — განაცხადა გამოძიების ფედერალური ბიუროს დირექტორმა, კრისტოფერ ვრეიმ

FBI-ს თქმით, ის იმარაგებდა ცეცხლსასროლ იარაღს, ასევე, გაყიდა ქონება და ოჯახის წევრების საზღვარგარეთ გაშვებას გეგმავდა.

ტავჰედი უცნობ თანამზრახველთან ერთად მოქმედებდა, რომელიც მისი ახლობელი, ასევე ავღანეთის მოქალაქეა. Google-ის ჩანაწერების მიხედვით, რომელიც ძალოვანმა სტრუქტურებმა მოიპოვეს, ის აქტიურად ეცნობოდა ისლამური სახელმწიფოს პროპაგანდას ინტერნეტში და რეგულარულად რიცხავდა თანხებს ტერორისტული ორგანიზაციის დასახმარებლად.

ტავჰედი AK-47-ის ტიპის ავტომატური ცეცხლსასროლი იარაღის შეძენას ცდილობდა, თუმცა პიროვნება, რომელსაც ამისათვის დაუკავშირდა, FBI-ის აგენტი აღმოჩნდა, რის შემდეგაც ორივე ეჭვმიტანილი დააკავეს.