GEM fest-ზე დასაქმებულები კუთვნილი ანაზღაურების მოთხოვნით, საპროტესტო აქციას მართავენ. გამოცემა Livepress ადგილიდან იუწყება, რომ მათ მუსიკალური ფესტივალის მთავარი შესასვლელი გადაკეტეს. ისინი ფესტივალის შესასვლელის იქამდე გადაკეტვით იმუქრებიან, სანამ მათი მოთხოვნა არ შესრულდება.

ამავე გამოცემასთან საუბარში, აქციის ერთ-ერთი მონაწილე აცხადებს, რომ დაპირებული 500 ლარის ნაცვლად, ადმინისტრაციამ მათ მხოლოდ 100 ლარი აუნაზღაურა. საუბარია ბილეთების კონტროლზე დასაქმებულ 42 ადამიანზე.

ფესტივალის ფინანსურ წარუმატებლობაზე გასულ კვირას ფესტივალის დამფუძნებელმა, გიორგი სიგუამაც ისაუბრა. მისი თქმით, კვების და სავაჭრო ობიექტები ვერ უხდიან იჯარის ფულს იმიტომ, რომ არ აქვთ მუშაობა. ამ მიზეზით ვერც GEM Fest-ის ორგანიზატორები იხდიან ქვეყნის შიგნით და გარეთ არსებულ ფინანსურ დავალიანებას.

ერთთვიანი ელოქტრონული მუსიკის ფესტივალი GEM fest 14 ივლისს გაიხსნა და 15 აგვისტოს დაიხურება.