მიმდინარე წლის აგვისტოში, რუსულმა საფეხბურთო კლუბმა "დინამო მაჰაჩყალამ", სადაც ქართველი ფეხბურთელი ჯიმი ტაბიძე თამაშობს, ერთი დღის შემოსავალი გადასცეს ფონდს, რომელიც კურსკის ოლქში დაზარალებულებს ეხმარება. ამის შესახებ ყაზახური პორტალი წერს. სტატია 2024 წლის 22 აგვისტოთა დათარიღებული.

მათი ცნობით, მანამდე დაღესტნის რესპუბლიკის მეთაურმა სერგეი მელიკოვმა გამოაცხადა ინიციატივა, რომ ერთი დღის შემოსავალი გადაერიცხა ფონდში "ვსე ვმესტე", რომელიც კურსკის რეგიონში დაზარალებულებს ეხმარება.

ყაზახური პორტალი წერს, რომ 19 აგვისტოს, რუსული პრემიერ-ლიგის მე-5 ტურში მაჰაჩყალას დინამოსა და ახმატის მატჩზე, კურსკისა და კურსკის ოლქის მცხოვრებთა მხარდასაჭერად ბანერი განთავსდა.

კლუბის გენერალური დირექტორი შამილ გაზიზოვი აცხადებს, რომ ფეხბურთელებმა და კლუბის თანამშრომლებმა მხარი დაუჭირეს დაღესტნის რესპუბლიკის მეთაურის, სერგეი ალიმოვიჩ მელიკოვის ინიციატივას და მათი ერთდღიანი შემოსავალი საქველმოქმედო ფონდში "ვსე ვმესტე" გადარიცხეს.

"დაღესტნელები ყოველთვის მზად არიან მხარი დაუჭირონ და დახმარება გაუწიონ კრიზისულ სიტუაციაში მყოფ თანამოქალაქეებს. დინამო დღეს დაღესტნის განუყოფელი ნაწილია. ჩვენ წარმოვადგენთ დიდ და ძლიერ რესპუბლიკას და გვესმის, რომ სოციალური პასუხისმგებლობა გვეკისრება დაღესტნის და ჩვენი ქვეყნის სხვა მოქალაქეების წინაშე. დინამო დაღესტანია. "დინამო კარგია", — თქვა დაღესტნური კლუბის გენერალურმა დირექტორმა შამილ გაზიზოვმა.

NEWS.On.ge საქართველოს ფეხბურთის ფედერაციას დაუკავშირდა იმის გასაგებად, აქვთ თუ არა მათ რაიმე ინფორმაცია ამ საკითხთან დაკავშირებით.

შეგახსენებთ, რომ ჯიმი ტაბიძე საფეხბურთო კლუბ მაჰაჩყალის დინამოსა და საქართველოს ეროვნული ნაკრების მცველია. ის რუსულ საფეხბურთო კლუბში 2024 წლის 30 ივლისიდან ირიცხება.

ფედერაციაში გვითხრეს, რომ მსგავსი გადაწყვეტილებები საკლუბო დონეზე მიიღება და ისინი არ ფლობენ ინფორმაციას, გადარიცხა თუ არა ჯიმი ტაბიძის გუნდმა ერთი დღის შემოსავალი კურსკის ოლქის დახმარების ფონდში. უცნობია, იქონიებს თუ არა ეს ფაქტი გავლენას სანაკრებო შეკრებაზე ფეხბურთელის გამოძახებაზე.

რაც შეეხება კურსკის ოლქს, რუსეთი უკრაინაში სრულმასშტაბიანი შეჭრიდან 2.5 წლის შემდეგ, მიმდინარე წლის 6 აგვისტოს, უკრაინის ჯარები სუმის ოლქიდან რუსეთის ტერიტორიაზე შევიდნენ და კურსკის ოლქის სუჯის რაიონის ნაწილი დაიკავეს. მომდევნო კვირების განმავლობაში უკრაინამ რამდენიმე მნიშვნელოვან და წარმატებას მიაღწია რუსეთის ამ რეგიონში და მოსკოვმაც კი აღიარა, რომ კიევმა ხელში ჩაიგდო მრავალი დასახლებული პუნქტი.