ერთიანობა-ნაციონალური მოძრაობის ერთ-ერთი ლიდერი, თამარ კორძაია ეხმაურება ანტიკორუფციული ბიუროს გადაწყვეტილებას, რომელმაც “საერთაშორისო გამჭვირვალობა— საქართველოს და აირჩიე ევროპას “გაცხადებული საარჩევნო მიზნის მქონე სუბიექტის სტატუსი მოუხსნა.

“რას ნიშნავს მოლაპარაკებებით კანონის აღსრულებაზე უარის თქმა?! - რაჟდენ კუპრაშვილის განცხადებამ დაადასტურა, რომ ამ ქვეყანას კანონი და კონსტიტუცია კი არ მართავს, მართავს ბიძინა ივანიშვილი”, — ამბობს კორძაია.

მისივე თქმით, კუპრაშვილმა კიდევ ერთხელ დაადასტურა, რომ ის ბიძინას დავალებების შემსრულებელი პირია.

"თუ მიაჩნდა, რომ კანონს სწორად განმარტავდა, სწორად ასრულებდა მოვალეობას, მაშინ რას ნიშნავს მოლაპარაკებებით კანონის აღსრულებაზე უარის თქმა? ერთი რამ ცხადია, რაჟდენ კუპრაშვილის განცხადებამ დაადასტურა, რომ ამ ქვეყანას კანონი და კონსტიტუცია კი არ მართავს, მართავს ბიძინა ივანიშვილი", — აღნიშნა კორძაიამ.

ცნობისთვის, ანტიკორუფციულმა ბიურომ გააუქმა გადაწყვეტილება საერთაშორისო გამჭვირვალობა— საქართველოსა და მისი აღმსრულებელი დირექტორის, ეკა გიგაურის “გაცხადებული მიზნის მქონე სუბიექტებად გამოცხადების” შესახებ.

კერძოდ, ირაკლი კობახიძემ ანტიკორუფციულ ბიუროს გუშინ მოუწოდა, რომ საერთაშორისო გამჭვირვალობასა და “გაცხადებული საარჩევნო მიზნის მქონე ორგანიზაციად აღიარებულ სხვა სუბიექტებთან” დაკავშირებული გადაწყვეტილება შეცვალოს.