"საქართველო აღიარებს დაშვებულ შეცდომებს აფხაზეთისა და სამხრეთ ოსეთის წინააღმდეგ" — ასე ეხმაურება კრემლის პროპაგანდისტული მედია "რია ნოვოსტი" ქართული ოცნების გენერალური მდივნის, თბილისის მერის კახა კალაძის განცხადებას.

რუსული მედია წერს, რომ თბილისის მერმა კიდევ ერთხელ აღიარა, რომ საქართველომ დაუშვა შეცდომები აფხაზეთთან და სამხრეთ ოსეთთან დაკავშირებით. მან მხარეებს შერიგებისკენაც მოუწოდა.

შეგახსენებთ, კალაძე დღეს ოკუპირებულ ტერიტორიებთან დაკავშირებით სერგეი ლავროვის განცხადებას გამოეხმაურა და იგი პოზიტიურად შეაფასა. მანვე თქვა, რომ "ყველა აცნობიერებს დაშვებულ შეცდომებს, რომელიც წლების წინ მოხდა".

"რუსეთის ფედერაციის განცხადება იმასთან დაკავშირებით, რომ ხელს შეუწყობს შერიგების პროცესს, ცუდი რა არის ამაში ხომ? პოზიტიურია ის, რომ ხელს შეუწყობს. მე ვფიქრობ, ყველა აცნობიერებს დაშვებულ შეცდომებს , რომელიც წლების წინ მოხდა. არ უნდა მოგვერიდოს ამაზე საუბარი. ჩვენც გვაქვს ჩვენი შეცდომები დაშვებული." — თქვა კალაძემ