ნაცისტური ეპოქის შემდეგ პირველად, ავსტრიის საპარლამენტო არჩევნებში ხმათა რაოდენობით პირველ ადგილზე ულტრამემარჯვენე პარტია გავიდა. თავისუფლების პარტიის (FPÖ) წარმატება, რომელმაც მემარჯვენე-ცენტრისტული სახალხო პარტიის (ÖVP) დამარცხება განაპირობა, დაკავშირებულია მიგრაციის პოლიტიკითა და ცხოვრების ხარჯების ზრდით მოსახლეობის უკმაყოფილებასთან.

პრორუსულმა და ანტიისლამურმა FPÖ-მ ხმათა 29.2% მიიღო, ხოლო მოქმედი კანცლერის, კარლ ნეჰამერის, პარტიამ 26.5%-ით მეორე ადგილი დაიკავა.

სოციალ-დემოკრატიულმა პარტიამ ისტორიაში ყველაზე დაბალი, 21%-იანი მხარდაჭერა მოიპოვა, ხოლო ლიბერალურმა NEOS-ს ამომრჩეველთა, დაახლოებით, 9%-მა დაუჭირა მხარი. ასევე, მიუხედავად იმისა, რომ დამანგრეველმა შტორმმა ბორისმა მიმდინარე თვეში კლიმატის პრობლემები წინ წამოწია, მწვანეებმა მხოლოდ 8.3% მიიღეს.

დასწრება საკმაოდ მაღალი იყო — არჩევნებში მონაწილეობა ელექტორატის 78%-მა მიიღო.

მიუხედავად პირველი ადგილისა, ულტრამემარჯვენე პარტიის მთავარ გამოწვევას კოალიციის შეკვრა წარმოადგენს, რაც მარტივი არ იქნება. სხვა ცენტრისტული პარტიებისგან განსხვავებით, სახალხო პარტია გამარჯვებულთან თანამშრომლობას არ გამორიცხავს.