საქართველოს პრემიერ-მინისტრი ირაკლი კობახიძე, ნიუ-იორკში, აშშ-ის პრეზიდენტ ჯო ბაიდენთან მიწვევის გაუქმებაზე კიდევ ერთ კომენტარს აკეთებს და ამტკიცებს, რომ გაუქმებული შეხვედრა აშშ-ის მხრიდან “ბავშვური ნაბიჯი” იყო.

"რაც შეეხება გაუქმებულ მიწვევას ვახშამზე, ხელის ჩამორთმევაზე , რომელიც იყო დაგეგმილი, ეს იყო ბავშვური ნაბიჯი. აშშ არის დიდი სახელმწიფო და გაბუტვა არ არის ის, რაც შეშვენის ამხელა სახელმწიფოს”, — განაცხადა კობახიძემ.

პრემიერი განმარტავს, რომ ბაიდენთან მიღებაზე ავტორიტარული ქვეყნების ლიდერები იყვნენ და ამაზე "საზოგადოება თავად გამოიტანს დასკვნას".

"რაც შეეხება, ხელის ჩამორთმევას, თუ ვახშამს, რაც იყო; ესწრებოდა რამდენიმე ათეული ავტორიტარული სახელმწიფოს ლიდერი" - ამბობს კობახიძე, თუმცა არ ასახელებს რომელი სახელმწიფოებს გულისხმობს.

მისივე თქმით, იმის შემდეგ, რაც ბაიდენთან შეხვედრა გაუქმდა, მან და აშშ-ში საქართველოს ელჩმა, დავით ზალკალიანმა "ქართულად ივახშმეს".