ცესკომ ოპოზიციის მოთხოვნა საზღვარგარეთ საარჩევნო უბნების დამატების შესახებ არ დააკმაყოფილა .

საზღვარგარეთ საარჩევნო უბნების საკითხი ცესკოს სხდომაზე დღეს, 26 სექტემბერს, განიხილეს. ცესკოში ერთიანობა ნაციონალური მოძრაობის წარმომადგენელმა დავით კირთაძემ დააყენა მოთხოვნა, რომ ყველგან, სადაც საქართველოს მოქალაქეებმა უბნების გახსნა მოითხოვეს, ისინი
დაუყოვნებლივ გაიხსნას, რადგან მისი განცხადებით, ყველა მოთხოვნა აკმაყოფილებს საქართველოს საარჩევნო კოდექსით დადგენილ მოთხოვნას.

უცხოეთის იმ ქალაქებს შორის, სადაც ოპოზიციის წარმომადგენელი საარჩევნო უბნების დამატებას ითხოვდა, არის: ბოსტონი, ლოძი, ტორონტო, ანტვერპენი,მაიამი, შტუტგარტი, ვალენსია, ჰამბურგი, ნეაპოლი და სხვები.

ცესკოს ცნობით, საგარეო საქმეთა სამინისტროდან მიღებული განახლებული მონაცემების მიხედვით, ქვეყნის ფარგლებს გარეთ საკონსულო აღრიცხვაზე 65 508 საარჩევნო უფლების მქონე საქართველოს მოქალაქე იმყოფება. ამ მონაცემებზე დაყრდნობით ცესკომ 42 ქვეყნის 53 ქალაქში 60 საარჩევნო უბნის გახსნა გადაწყვიტა.