საპარლამენტო არჩევნებისთვის, ცესკო საზღვარგარეთ მხოლოდ 60 საარჩევნო უბნის გახსნას გეგმავს.

ცესკოს ინფორმაციით, საგარეო საქმეთა სამინისტროდან მიღებული განახლებული გამოთვლებით, უცხოეთში საკონსულო აღრიცხვაზე 65 508 საარჩევნო უფლების მქონე საქართველოს მოქალაქე იმყოფება. აქედან გამომდინარე, 42 ქვეყანაში, 60 საარჩევნო უბანი გაიხსნება.

იმავე ინფორმაციით, საარჩევნო უბნები ისეთ ქვეყნებში გაიხსნება, სადაც წინა საპარლამენტო არჩევნებზე, ან ზოგადად არცერთ წინა არჩევნებზე არ ყოფილა, მაგალითად: არაბთა გაერთიანებულ საამიროებში, ფინეთის რესპუბლიკაში, კორეის რესპუბლიკაში, იაპონიასა და ავსტრალიის თანამეგობრობაში.

დეტალურ ინფორმაციას ცესკო იმის თაობაზე, თუ კონკრეტულად რომელ უბნებში გაიხსნება საარჩევნო უბნები, დღეს, 26 სექტემბერს, სხდომის დასრულების შემდეგ გაასაჯაროებს.

ინფორმაციისთვის, წინა წლებში, ვთქვათ 2020 წლის საპარლამენტო არჩევნების დროს, რომელიც ჩატარდა კორონავირუსის პერიოდში, 38 სახელმწიფოში 52 საარჩევნო უბანი იყო გახსნილი.

2020 წლის არჩევნების უცხოეთის საარჩევნო უბნებზე დარეგისტრირებული იყო 66 217 საქართველოს მოქალაქე, რომლის ნაწილი საკონსულო აღრიცხვაზე იყო, ნაწილი კი არჩევნებში მონაწილეობის მიზნით დარეგისტრირდა.
შედეგად, არჩევნებში მონაწილეობა საზღვარგარეთ საქართველოს 12 247-მა მოქალაქემ მიიღო.

ემიგრანტებს რომლებმაც ვერ მოასწრეს საკონსულო აღრიცხვაზე დადგომა, მაინც შეძლებენ არჩევნებში მონაწილეობას, თუ 7 ოქტომბრამდე რეგისტრაციის გავლას სხვა სახელმწიფოში შექმნილ საუბნო საარჩევნო კომისიაში — საზღვარგარეთ საქართველოს დიპლომატიურ წარმომადგენლობაში ან საქართველოს საკონსულო დაწესებულებაში შეძლებენ.