თურქეთის პოლიციამ დააკავა რუსეთის მოქალაქე რენატ ბაკიევი, რომელიც ადანას პროვინციაში, ინჯირლიკის ამერიკულ ავიაბაზაზე თავდასხმას გეგმავდა. ინფორმაციას თურქული სახელისუფლებო მედიასაშუალება Daily Sabah ავრცელებს.

საინფორმაციო სააგენტოს ცნობით, რენატ ბაკიევი დაეშის, იგივე ტერორისტული ორგანიზაცია ისლამური სახელმწიფოს ინსტრუქციით მოქმედებდა. ის ტერორისტ თანამოაზრეებს მესინჯერ ტელეგრამის საშუალებით ეკონტაქტებოდა და მათგან 2 800 ლირა (1 894 ლარი) მიიღო დრონის საყიდლად. არსებული ინფორმაციით, ის აღნიშნული დრონის შეჯახებას ამერიკულ თვითმფრინავზე აპირებდა.

როგორც თურქი სამართალდამცავები აცხადებენ, გარდა ავიაბაზაზე თავდასხმისა, რუსეთის მოქალაქე გეგმავდა ადანაში რელიგიური უმცირესობის, ალევიტების წარმომადგენლებზე თავდასხმასაც.

რენატ ბაკიევი მუქარის განხორციელებისა და ასევე, ტერორისტებთან კავშირის ბრალდებით, გარკვეული პერიოდის წინ სამართალდამცავებმა დაკითხეს. რაც შეეხება ინჯირლიკის ავიაბაზას ამერიკის შეერთებული შტატები სწორედ ამ ბაზიდან ახორციელებს ავიაიერიშებს ისლამურ სახელმწიფოზე სირიასა და ერაყში.