გერმანიის ერთ-ერთ სუპერმარკეტების ქსელში, ბანანის ყუთებში 7 მლნ ევროს კოკაინი აღმოაჩინეს. ამის შესახებ ინფორმაციას DW ავრცელებს.

სამართალდამცველები სუპერმარკეტის ქსელს არ ასახელებენ, თუმცა აღნიშნავენ, რომ კონტრაბანდული ნივთიერება ჩრდილოეთ-რაინ ვესტფალიის რამდენიმე ქალაქში აღმოაჩინეს.

თავდაპირველად კოკაინი ქალაქ მენხენგლადბახში ორი მაღაზიის თანამშრომლებმა იპოვეს. მოგვიანებით, ნარკოტიკი სხვა ქალაქებშიც ნახეს.

გამოძიება ვარაუდობს, რომ მაღაზიათა ქსელი ნარკოტიკის ადრესატი არ ყოფილა. სამართალდამცველების ვერსიით, კოკაინი სამხრეთ ამერიკიდან ანტვერპენის პორტში ჩაიტანეს, რის შემდეგაც მისი გერმანიაში ტრანსპორტირება მოხდა.