კოლექციონერობა რომ ძვირიანი ჰობია, ეს ყველა ხელოვნების მოყვარულმა იცის. სწორედ ამიტომაა, რომ მსოფლიოს ყველაზე ექსკლუზიურ აუქციონებზე ყველაზე ცნობილი მხატვრების ყველაზე მნიშვნელოვან ნამუშევრებს მხოლოდ ყველაზე მდიდრები ყიდულობენ.

წარმოგიდგენთ 10 ნახატს, რომელთა ასტრონომიულმა ფასებმაც აუქციონებზე რეკორდები დაამყარეს:

1. ლეონარდო და ვინჩი, სალვატორ მუნდი — $450.3 მილიონი

ალბათ, არც ისეთი გასაკვირია, რომ აუქციონების ისტორიაში ყველაზე ძვირად იტალიელი მაესტროს, ლეონარდო და ვინჩის ნახატი გაიყიდა. Christie's-ის, მსოფლიოს ყველაზე მსხვილი სააუქციონო სახლის მფლობელობაში მყოფი ნახატი 2017 წელს რეკორდულ ფასად საუდის არაბეთის პრინცმა, მოჰამედ ბინ სალმანის წარმომადგენლებმა შეიძინეს.

2. ვილემ დე კუნინგი, გაცვლა — $300 მილიონი

ჰოლანდიელი მოდერნისტი მხატვრის ნახატი გაცვლა დევიდ გეფენის ფონდის მიერ მოწყობილ კერძო აუქციონზე 2015 წელს გაიყიდა. ეს მნიშვნელოვანი ნამუშევარი თავბრუდამხვევ ფასად ინვესტიციების ფონდის მენეჯერმა, კენეთ გრიფინმა შეიძინა.

3. პოლ სეზანი, კარტის მოთამაშენი — $250 მილიონი

პოლ სეზანის შემოქმედებაში ყველაზე ცნობილი ნამუშევარიც კერძო აუქციონზე გაიყიდა. ის 2011 წელს ყატარის სამეფო ოჯახმა შეიძინა.

4. პოლ გოგენი, Nafea Faa Ipoipo (როდის გათხოვდები?) — $210 მილიონი

პოლ გოგენის უზადო ტექნიკითა და გამორჩეულ ფერთა პალიტრაში შესრულებული ნამუშევარი $210 მილიონად 2015 წელს ყატარის მუზეუმმა შეიძინა.

5. ჯეკსონ პოლოკი, Number 17A — $200 მილიონი

კეეთ გრიფინი გახსოვთ, ხომ? დე კუნინგის გაცვლასთან ერთად ამაზე აუქციონზე მან პოლოკის ეს გამორჩეული ნამუშევარიც შეიძინა.

6. მარკ როთკო, No. 6 — $186 მილიონი

როთკოს ცნობილი ნახატის მფლობელი პომპეზური თანხის სანაცვლოდ 2014 წელს რუსი მილიარდერი, დიმიტრი რიბოლოვლევი გახდა.

7. პაბლო პიკასო, Les Femmes d'Alger — $179.4 მილიონი

ეს ნამუშევარი Christie's-ს აუქციონის რეკორდსმენი იყო, იქამდე, სანამ და ვინჩის ნახატი $450 მილიონად გაიყიდებოდა. პიკასოს შედევრი ყატარის ყოფილმა პრემიერ-მინისტრმა, ჰამად ბინ ჯასიმ ბინ ჯაბერ ალ თანიმ 2015 წელს იყიდა.

8. ამადეო მოდილიანი, Nu Couché – $170.4 მილიონი

ხომ არ გეგონათ, რომ ყველაზე ძვირადღირებული ნახატების სიაში ამადეო მოდილიანის ნახატს ვერ ნახავდით? ლეგენდარული მხატვრის ეს ნუდისტური ნამუშევარი ჩინელმა მილიარდერმა, ლიუ იციანმა Christie's-ს აუქციონზე 2015 წელს შეიძინა.

9. როი ლიხტენშტეინი, შედევრი — $165 მილიონი

შეიძლება, როი ლიხტენშტეინის სტილი ხელოვნების ყველა მოყვარულის სტილში ვერ ჯდება, თუმცა მათ, ვინც პოპ არტს აფასებს, მის ნამუშევრებისათვის მილიონები არ ენანებათ. ლიხტენშტეინის ამ ნამუშევრის მფლობელიც ჩვენთვის უკვე ცნობილი კენეთ გრიფინია. მან ნახატი 2017 წელს შეიძინა.

10. ვინსენტ ვან გოგი, ექიმი გაშეს პორტრეტი — $161 მილიონი

ვან გოგის ერთ-ერთი საკულტო ნამუშევარი, რომელზეც ზედმიწევნით ჩანს მხატვრის უნიკალური სტილი, მონასმენი და ფერები, 1990 წელს იაპონელმა ბიზნესმენმა, რიოეი საიტომ შეიძინა. იმ დროისთვის ექიმი გაშეს პორტრეტი ყველაზე ძვირიანი ნახატი იყო, რომელიც აუქციონზე ოდესმე გაყიდულა.