შსს-ს თანამშრომლებმა, საქართველოს ყოფილი დეპუტატის, გივი თარგამაძის განზრახ მკვლელობის მცდელობისთვის ძებნილი პირი დააკავეს.

დაკავებულმა 50 წლის მამაკაცმა თურქეთიდან საქართველოს სახელმწიფო საზღვარი ე.წ. მწვანე ზოლის საშუალებით გადმოკვეთა.

19 სექტემბერს, თურქეთ-საქართველოს საზღვარზე, სასაზღვრო სექტორ კარწახის დასაცავ მონაკვეთზე დამონტაჟებული დაკვირვების ტექნიკური საშუალებებით დაფიქსირდა პიროვნება, რომელმაც უკანონოდ გადმოკვეთა საქართველოს საზღვარი. მას არ ჰქონდა პირადობის დამადასტურებელი არანაირი დოკუმენტაცია, ამიტომ იდენტიფიცირების მიზნით სასაზღვრო სექტორის ადმინისტრაციულ შენობაში გადაიყვანეს.

დაკავებულმა შეცდომაში შეყვანის მიზნით საკუთარი სახელისა და გვარის დასახელების ნაცვლად, სხვისას ასახელებდა. სასაზღვრო პოლიციამ მისი პირველადი იდენტიფიცირება მოახერხა და შსს-ს მონაცემების ბაზით გაირკვა, რომ მამაკაცი ძებნილია 2016 წლიდან შსს-ს, ხოლო 2017 წლიდან ინტერპოლის მიერ საერთაშორისო დონეზე წითელი ცირკულარით სისხლის სამართლის კოდექსის 19-109-ე, 236-ე და 187-ე მუხლების შესაბამისად.

შსს-ს ინფორმაციით, გამოძიების ფარგლებში ჩატარებულმა ჰაბიტოსკოპიურმა ექსპერტიზამ დაადასტურა მისი ვინაობა.

დაკავებული პოლიციამ პენიტენციურ დაწესებულებაში, თბილისის სასამართლოს 2019 წლის 22 მარტის განაჩენის საფუძველზე, მსჯავრდადებულის სახით დააკავა.

შსს-ს ცნობით, დაკავებული საქალაქო სასამართლომ დამნაშავედ ცნო დამამძიმებელ გარემოებებში განზრახ მკვლელობის მცდელობის, ცეცხლსასროლი იარაღის, საბრძოლო მასალის, ფეთქებადი ნივთიერების, ასაფეთქებელი მოწყობილობის მართლსაწინააღმდეგოდ შეძენის, შენახვა-ტარების, გასაღებისა და სხვისი ნივთის დაზიანება-განადგურებისთვის და სასჯელის სახით 18 წლით თავისუფლება აღუკვეთა.

ცნობისთვის, გივი თარგამაძის მკვლელობის მცდელობის ფაქტზე, შსს აგრძელებს დაკავებულის თანამზრახველი პირების დადგენას.