17 სექტემბერს პრეზიდენტის სასახლეში გიორგი გახარიას და მამუკა ხაზარაძის "შეხვედრა სხვა არაფერია, თუ არა პრეზიდენტისთვის კონსტიტუციით განსაზღვრული ნეიტრალიტეტის დარღვევა და მისი პოზიციონირება შეიძლება შეფასდეს მხოლოდ, როგორც ადმინისტრაციული რესურსის გამოყენება", — ამის შესახებ საპარლამენტო უმრავლესობის წევრის, გივი მიქანაძის განცხადებაშია საუბარი. მისი თქმით, საარჩევნოდ გიორგი გახარიას პარტიის და კოალიცია ძლიერი საქართველოსთვის გაერთიანებისკენ მოწოდება და შეხვედრების გამართვა "პრეზიდენტისთვის კონსტიტუციით განსაზღვრული ნეიტრალიტეტის დარღვევა".

"16 სექტემბერს სალომე ზურაბიშვილმა მამუკა ხაზარაძესა და გიორგი გახარიას პარტიებს არჩევნებისთვის გაერთიანებისკენ მოუწოდა და კონსულტაციებისთვის ისინი ორბელიანების სასახლეში მიიპატიჟა. შეხვედრა პრეზიდენტის შუამავლობით 17 სექტემბერს გაიმართა და ეს სხვა არაფერია, თუ არა პრეზიდენტისთვის კონსტიტუციით განსაზღვრული ნეიტრალიტეტის დარღვევა და მისი პოზიციონირება შეიძლება შეფასდეს მხოლოდ, როგორც ადმინისტრაციული რესურსის გამოყენება,“ — ნათქვამია საპარლამენტო უმრავლესობის წევრის, გივი მიქანაძის განცხადებაში.

მიქანაძის განცხადებაში საუბარია იმ ფაქტორებზე, რამაც ბოლო კვირებში საარჩევნო გარემო დააზიანა. მათ შორის დასახელებულია: აირჩიე ევროპას ჩართულობა ხელისუფლების საწინააღმდეგო აგიტაცია-პროპაგანდაში. ასევე — 17 სექტემბერს ტელეკომპანია „ფორმულას“ მიერ გავრცელებული ინფორმაცია, თითქოს ევროკავშირის დონეზე ფაქტობრივად მიღწეული იყო შეთანხმება არჩევნების შემდეგ საქართველოსთვის უვიზო მიმოსვლის შეჩერების თაობაზე. აღნიშნული ფაქტი არ დადასტურდა, უფრო მეტიც, აღნიშნული დეზინფორმაცია რადიო თავისუფალი ევროპის ევროპის ბიუროს რედაქტორმა, რიკარდ იოზვიაკმაც უარყო.