როგორც უკვე იცით, ამერიკის კინემატოგრაფიული ხელოვნებისა და მეცნიერების აკადემიას წელს 774 ახალი წევრი დაემატა.

მათ შორის კი ქართველი რეჟისორი ნანა ჯორჯაძეც არის, რომლის ფილმი შეყვარებული კულინარის 1001 რეცეპტი 1997 წელს ოსკარის ნომინაციაზე, საუკეთესო უცხოენოვანი ფილმის კატეგორიაში იყო წარდგენილი.

ამერიკის კინოაკადემიამ 2016 წელს 683, ხოლო 2015 წელს 322 ახალი წევრი დაიმატა, ამის გავითვალისწინებთ, შეიძლება ითქვას, რომ წელს აკადემიაში წევრთა რეკორდული რაოდენობა მიიღეს.

ნანა ჯორჯაძე ერთადერთი ქართველი არ არის ვინც ამერიკის კინოაკადემიის წევრი იქნება. მას შემდეგ რაც მანდარინები ოსკარის ნომინაციაზე წარადგინეს, აკადემიამ რეჟისორი ზაზა ურუშაძეც საკუთარ შემადგენლობაში მიიღო.

წლევანდელ წევრებს შორის აღსანიშნავია ისიც, რომ ისინი 57 სხვადასხვა ქვეყნიდან არიან და მათ შორის 39% ქალია, ხოლო 30% ფერადკანიანი, რაც წინა წლებთან შედარებით უკეთესი მაჩვენებელია.

ახალ წევრებს შორის ასევე მოხვდნენ: აიშვარია რაი, მონიკა ბელუჩი, ამანდა სეიფრიდი, ემი პოლერი, კრის ჰემსვორტი, კრის პრატი, დუეინ ჯონსონი, ედგარ რამირესი, კრისტენ სტიუარტი, რუთ ნეგა, სარა პოლსონი, ვიგო მორტენსენი, ზაქარი ქუინტო, ადამ დრაივერი, კრის ევანსი, ფან ბინგბინგი, გალ გადოტი, შარლოტა გინსბურგი, რუპერტ გრინტი, ნაომი ჰარისი, ნიკ კეივი და სხვები.

აქვე უნდა ითქვას ისიც, რომ აკადემიის ამჟამინდელ პრეზიდენტს, შერილ ბუნ აიზეკსს რომელიც 2013 წელს აირჩიეს, უფლებამოსილება ივლისში ეწურება. აკადემიის წევრებს კი ახალი ლიდერის არჩევა მოუწევთ.

ამერიკის კინემატოგრაფიული ხელოვნებისა და მეცნიერების აკადემიას, რომელიც კინოს ყველაზე პრესტიჟულ ჯილდოს ოსკარს გასცემს, უკვე 8 ათასზე მეტი წევრი ჰყავს.