სალვადორ დალისა და გალა დალის (ელენა დიაკონოვა) სიყვარულის შესახებ არაერთხელ დაწერილა.

1913 წელს ელენა გაემგზავრა შვეიცარიაში ჭლექისგან სამკურნალოდ. იქვე გაიცნო ახალგაზრდა ფრანგი პოეტი პოლ ელუარი. გალა ელუართან ერთად სიურრეალისტურ მოძრაობაში მოხვდა.

პირველად გალა და დალი ერთმანეთს 1929 წლის ზაფხულში შეხვდნენ, მაგრამ მხატვარი ამტკიცებდა, რომ თავისი მუზა გაცილებით ადრე ნახა, როდესაც პირველ კლასში სწავლობდა.

ფოტო: The Collecto

ელენას და დალის შორის გატაცება მალე სერიოზულ ურთიერთობაში გადაიზარდა და მიუხედავად იმისა, რომ გალა სალვადორზე 11 წლით უფროსი იყო 1932 წელს მათ იქორწინეს.

გალა დალის მუზად იქცა. მხატვრის თქმით, რომ არა გალა, ის ან ნაადრევად გარდაიცვლებოდა ან ჭკუიდან შეიშლებოდა. გალა წლების მანძილზე ასრულებდა მედიატორის როლს მხატვრის სამყაროსა და რეალობას შორის. მეუღლეებს შორის ყველაზე სუსტი სექსუალური დამოკიდებულება იყო. ალბათ ამიტომაც გალას უამრავი გატაცება ჰქონდა წლების მანძილზე, მათ შორის ყოფილ მეუღლესთან – პოლ ელუართან.

სალვადორ დალი და გალა დალი

სალვადორ დალი და გალა დალი

ფოტო: The Collector

სალვადორ დალისა და გალას წყვილი ყოველთვის იყო ფოტოკამერების სამიზნე. ისინი აქტიურ საჯარო ცხოვრებას ეწეოდნენ და გამუდმებით ხვდებოდნენ ჟურნალების ყდებზე. 1934 წელს ცოლ-ქმარი ამერიკაში გაემგზავრა. შეერთებულ შტატებში მათ ექსტრავაგანტურად დახვდნენ. აშშ "სიურრეალისტურმა ციებ-ცხელებამ" მოიცვა. დალის პატივსაცემად, იმართებოდა მეჯლისები, რომელსაც ნიუ-იორკის ბომონდი ესწრებოდა. ამერიკიდან დალი და გალა მდიდრები და ცნობილები დაბრუნდნენ. წყვილის ქონება იზრდებოდა, მაგრამ გალა სილამაზესა და ძალას კარგავდა.

ფოტო: The Collector

გენიალური და ამასთან, ახირებული მხატვრისთვის, რომელსაც ქალები აშინებდა, გალა ღვთაება იყო. წიგნში — ერთი გენიოსის დღიურები მხატვარი წერს:

"ვუძღვნი ამ წიგნს ჩემს გენიას, ჩემს გამარჯვების ქალღმერთ გალას, ჩემს ელენე ტროელს, ჩემს წმინდა ელენეს, ჩემს ზღვის ზედაპირივით ბრწყინვალე გალათეას."

მიუხედავად იმისა, რომ გალა დალი სილამაზეს კარგავდა, ის მუდმივად ახალ საყვარელს იჩენდა, დალი კი ცოლის ინტრიგებზე დუმდა. გალა კი ამბობდა:

"სალვადორისთვის ყველაფერი სულ ერთია, თითოეულ ჩვენგანს თავისი ცხოვრება აქვს"

გალა 1982 წელს, ხანგრძლივი ავადმყოფობის შემდეგ გარდაიცვალა. მის დაკრძალვას სალვადორ დალი არ დასწრებია.