16 სექტემბერს, საქართველოს პრეზიდენტმა, სალომე ზურაბიშვილმა ორი პარტიის — პარტია გახარია საქართველოსთვის და კოალიცია ძლიერი საქართველოს, ლიდერები გაერთიანებაზე მოლაპარაკებების დასაწყებად პრეზიდენტის სასახლეში მოიწვია.

კოალიცია ძლიერი საქართველოს ლიდერი, მამუკა ხაზარაძე, პრეზიდენტის ინიციატივას იმავე დღეს გამოეხმაურა. ხაზარაძე დათანხმდა პრეზიდენტის მიწვევას, მაგრამ დასძინა, რომ მანამდე გიორგი გახარიასთან სურდა შეხვედრა.

"მე გავუგზავნე მას პირადი შეტყობინება შეხვედრის სურვილით, სამწუხაროდ, ასეთი პირადი ერთი-ერთზე შეხვედრა დღეს ვერ ხერხდება.

მიმაჩნია, რომ უპატივცემულობა იქნებოდა, თუკი ჩვენ პრეზიდენტს ერთობლივად შევხვდებოდით, სანამ არ გვექნება კონკრეტული ხედვა ორი, დამოუკიდებელი პოლიტიკური სუბიექტის ერთობლივი მუშაობის შესახებ.

გვაქვს თუ არა რაიმე საერთო ვალდებულება ევროპული მომავლის მიმართ. მე მზად ვარ ნებისმიერ მომენტში შევხვდე გიორგი გახარიას პირადად და მხოლოდ ამის შემდეგ შევხვდეთ პრეზიდენტს.

კიდევ ერთხელ, მინდა მადლობა გადავუხადო პრეზიდენტს მისი პოზიციის გამო," — წერს ხაზარაძე.


გიორგი გახარიამ, ცოტა ხნის წინ Facebook-ზე დაწერა, რომ ითვალისწინებს ხაზარაძის თხოვნას და მზადაა მოლაპარაკებებისთვის.

"ვითვალისწინებ მამუკა ხაზარაძის თხოვნას. ვესაუბრე ქალბატონ პრეზიდენტს და ვთხოვე, პრეზიდენტის სასახლეში შეხვედრის რამდენიმე საათით გადადება.

პრეზიდენტი დამეთანხმა, შეხვედრა გადაიდო 6 საათამდე.

თუმცა ეს საკითხი მეტი ხნით ვერ გადაიდება", — წერს გახარია.