"ცენტრალური საარჩევნო კომისიის თავმჯდომარე ზეწოლას ახდენს შაბათის ეთერის გუნდზე და მუქარით აიძულებს შეწყვიტოს ცესკოს საქმიანობის შესახებ მასალის მომზადება", — ამის შესახებ, TV პირველის საინფორმაციო სამსახურის უფროსი და გამომძიებელ ჟურნალისტთან გუნდის ტელეპროექტის ავტორი ნოდარ მელაძე აცხადებს.

მანამდე ცენტრალური საარჩევნო კომისიის თავმჯდომარე, გიორგი კალანდარაშვილმა TV პირველს ბრალი დასდო საარჩევნო ადმინისტრაციის თანამშრომლების პერსონალური მონაცემების, სავარაუდოდ, კანონის საწინააღმდეგოდ დამუშავებაში.

„2024 წლის 26 ოქტომბრის საქართველოს პარლამენტის არჩევნების მოახლოებასთან ერთად, საარჩევნო ადმინისტრაციის თანამშრომლებზე სავარაუდო ზეწოლის და მათი პერსონალური მონაცემების კანონის საწინააღმდეგოდ დამუშავებისა და გამოყენების მცდელობა გრძელდება და ინტენსიურ ხასიათს იძენს. ამჯერად საუბარია ტელეკომპანია TV პირველის ერთ-ერთი წარმომადგენლის მხრიდან საარჩევნო ადმინისტრაციის თანამშრომელთა შესახებ პერსონალური ინფორმაციის სავარაუდოდ უკანონოდ დამუშავების მცდელობაზე. სამწუხაროა, რომ ეს არ არის აღნიშნული ტელეკომპანიის მხრიდან ადმინისტრაციის თანამშრომელთა მონაცემთა უკანონოდ დამუშავების მცდელობის პირველი შემთხვევა", — თქვა კალანდარაშვილმა.

ნოდარ მელაძის განცხადებაში წერია, რომ პროექტის ჟურნალისტები ცესკოს განცხადებას მუქარად აღიქვამენ.

"ეს არის ტყუილი! თუ ჟურნალისტი გაიგებს ტელეფონის ნომერს ან მისამართს რომ დასვას კითხვები და გადაამოწმოს ფაქტები, რომელიც ეხება კონკრეტულ მასალას, რატომ არის ეს პერსონალური მონაცემების უკანონო დამუშავება. იცით რა იგულისხმა ცესკოს შეფმა? საიდან გაიგეს მისამართებიო?

...ჩვენ მოვითხოვთ ამ ჩანაწერის მკაფიო განმარტებას, რას ნიშნავს თანამშრომლობის გადახედვა? ანუ აკრედიტაციის შეჩერებას? არჩევნების პროცესში ცესკოში და საარჩევნო უბნებზე აღარ შეგვიშვებენ რომ არჩევნები აღარ გავაშუქოთ, თუ ქართული ოცნების მსგავსად ბოიკოტის რეჟიმში გადავლენ და კრიტიკული მედიის კითხვებს აღარ უპასუხებენ. განაცხადა ნოდარ მელაძემ. ჩვენ აღგვიქვამთ ცესკოს თავმჯდომარის განცხადებებს რეალურად მუქარად, რადგან დიდია რისკი, რომ ერთი პარტიის ლეგიტიმაციით თანამდებობაზე არჩეულმა გიორგი კალანდარიშვილმა მედიაზე ანგარიშსწორებისთვის გამოიყენოს, ამავე პარტიის კონტროლის ქვეშ მყოფი, სასამართლოს კლანი ჟურნალისტების დასასჯელად. რაც მანამდე არა ერთხელ გაუკეთებიათ მაღალი თანამდებობის პირებს", — განმარტავს მელაძე.

TV პირველი მოუწოდებს ცენტრალურ საარჩევნო კომისიის ადმინისტრაციას და თანამშრომლებს, რომ უპასუხონ კითხვებს, რომელიც მედიას აქვს კონკრეტული რეპორტაჟის მზადების პროცესში.