ოპოზიციონერი დეპუტატი რომან გოცირიძე გამოდის ინიციატივით, რომ ანაკლიის საზღვაო ნავსადგურზე, გარკვეული დროით, წილების 50%-ზე მეტის ფლობა მხოლოდ საქართველოს სახელმწიფოს შეეძლოს, რუსეთის ფედერაციასთან დაკავშირებულ სუბიექტებს კი, ანაკლიის პორტში წილის ფლობა აეკრძალოთ.

“რუსეთის უკრაინაში შეჭრის შემდეგ, საქართველოს ხელისუფლების ანტიდასავლური განცხადებებისა და პარლამენტის მიერ “უცხოური გავლენის გამჭვირვალობის შესახებ” კანონის მიღების ფონზე, მმართველი პარტიის მიერ გადადგმული ნაბიჯები ქვეყანაში რუსული გავლენების გაზრდის საფრთხეს აჩენს.

კანონპროექტის მიზანია საკანონმდებლო შეზღუდვის შემოღება იმისთვის, რომ ანაკლიის საზღვაო ნავსადგურში წილობრივი მონაწილეობა ვერ შეძლონ რუსეთის ფედერაციის რეზიდენტმა ფიზიკურმა, იურიდიულ პირებმა და რუსეთის ფედერაციის კანონმდებლობით გათვალისწინებულმა სხვა ორგანიზაციულმა წარმონაქმნებმა. გარდა ამისა, ინიციატივის მიზანია ანაკლიის ნავსადგურზე საქართველოს სახელმწიფოს წილობრივი უპირატესობის საკანონმდებლო უზრუნველყოფა განსაზღვრული დროით — აღნიშნული შეზღუდვა იმოქმედებს ანაკლიის საზღვაო ნავსადგურის მშენებლობის პირველი ფაზის დასრულებისა და ექსპლუატაციაში შესვლამდე”, — განაცხადა რომან გოცირიძემ.